Афанасий Парфенов аатынан спортивнай комплекска бильярдка биир сэргэх күрэхтэһии буолла. Турниры Бэрдьигэстээх сайдыытыгар бэйэтин кылаатын киллэрсэ сылдьар, ЧОП охраннига, бильярдка улуус хас да төгүллээх чемпиона, призера Александр Максимов 65 сааһын туолбут, бэлиэ күнүн көрсө, тэрийдэ.
Икки күннээх күрэхтэһиигэ, улуус бильярдистарын кытары Илбэӈэ уолаттара кэлэн, күрэхтэһиини киэргэппиттэрэ хайҕаллаах. Быһа түһэн эттэххэ, Бүлүү улууһун дьоно илии тутуурдаах, өттүк харалаах бардылар.
Бу күн буруйдааҕын Бэрдьигэстээх нэһилиэгин баһылыга Алексей Аргунов, АМПКиС дириэктэрэ Анна Чемезова үтүө үлэһит киһини бэлиэтээн туран, Бочуотунай Грамотанан, Махтал суругунан эҕэрдэлээтилэр.
Бильярд спордун сэргээччилэрэ, спорт бу көрүӈүн сайдыытыгар, төһүү күүс буолар киһилэригэр убаастабылларын биллэрэн, балыктыырыгар анаан тыы бэлэхтээтилэр.
Бастаан, 60 үөһээ саастаах дьон пьедестал миэстэлэрин былдьастылар. Барыта 12 киһи суруттарда. Тыҥааһыннаах оонньуулары туораан, финалга Илбэӈэттэн ыалдьыппыт Андрей Андреев Одунуттан Иннокентий Колесовы хотон, телевизор хаһаайынынан буолла. Иккис миэстэлээх «Патриот» эрбии бириистэннэ. Үһүс миэстэни Одуну бильярдиһа Петр Федотов Бэрдьигэстээхтэн Николай Гермогеновы баһыйа тутан, күлүүс наборунан наҕараадаланна.
Эдэрдэргэ финалга 16 киһиттэн, икки Одуну ыччаттара таҕыстылар. Быһаарыылаах киирсиигэ Василий Семенов табаарыһын эрэллээхтик кыайан, иккис телевизоры тутта. Давид Дмитриев «Патриот» эрбиини хаһаайыстыбатыгар туһаныаҕа. Үһүс миэстэни улуус киинин спортсмена Егор Тарасов Одунуттан Радион Жирковы хотто, уонна өссө биир күлүүс наборун ылла.
Күрэхтэһии бириистэрэ кырдьык да, олус сыаналыахтарын бары астына бэлиэтээтилэр. Спорт бу көрүӈэр, өссө итинник бэлэхтэр олохтоно илик буолуохтаахтар. Андрей Андреев бастакы улахан ситиһиилэнэн, телевизорынан наҕараадаланан, Бэрдьигэстээх түһүлгэтигэр кыайыы дьоло тосхойбутунан махталын биллэрдэ. Бэйэтин холугар кыайыы дьолун туппут, күүстээх бильярдистарын кэннигэр хаалларбыт, Петр Федотов бэркэ табыллан оонньообутун этэр. Инники сылларга үс бастыӈ иһигэр киирэр туһунан санаабат да этим диир. Бырааттарым сүбэлэринэн-амаларынан үһүс миэстэни ыламмын, олус долгуйдум диир.
Үбүлүөйдэригэр чугаһаппыт уолаттар: «Александр Филиппович «планканы» аһара үрдэттиӈ» – диэн толкуйга түстүлэр. Онон барыта иннигэр.
Бильярд спордун өрө туппут, үтүө үлэһит киһибитигэр Александр Филипповичка, кэргэнигэр Тамара Егоровнаҕа, оҕолоругар өрүүтүн үөрэ-көтө сылдьыӈ, дьоллоох доруобай буолуӈ, сиэннэргит, оҕолоргут тапталларыгар уйдаран өссө да уһуннук олоруӈ, чөл, чэгиэн олоҕу, спорду өйүү, көҕүлүү сылдьыӈ диэн Алгыспытын аныыбыт.
Вячеслав Алексеев.