Бүгүн, алтынньы 16 күнүгэр, VIII Норуоттар икки ардыларынааҕы «Үрүҥ хаар алгыһа» поэзия бэстибээл кыттааччылара уонна ыалдьыттара Кытай, Монголия, Бразилия, Ираак, Казахстан, Татарстан, Оренбург, Калуга уонна дойдубут кииниттэн Мосваттан биһиги улууспутугар ыалдьыттыы кэллилэр.
Күн бастакы аҥарыгар поэзияҕа сүҥкэн суолу-ииһи хаалларбыт, саха народнай суруйааччыларыгар, ини-бии бырааттыы Семен, Софрон Даниловтар албан ааттарыгар сүгүрүйэн пааматынньыктарыгар сибэкки дьөрбөтүн уурдулар.
Салгыы саха норуотун култуурунай, духуобунай сыаннаһын байытар бэстибээл чэрчитинэн улуу дьоммут дойдуларыгар Мытаахха айаннаатылар.
Кэлбит ыалдьыттары сахалыы сиэринэн арыылаах алаадьынан, уохтаах кымыһынан айах тутан көрүстүлэр.
Үрдүк сыанаттан истиҥ эҕэрдэлэр үтүө тыллар этилиннилэр.
Санатан эттэххэ, VIII Норуоттар икки ардыларынааҕы «Үрүҥ хаар алгыһа» бэстибээл өрөспүүбүлүкэбитигэр алтынньы 14 ыытылла турар.
Тэрээһин аан бастаан 2012 с. ыытыллыбыта, онтон ыла икки сылга биирдэ РФ норуоттарын, СНГ уонна тас дойдулар литератураларын кытта сибээһи бөҕөргөтүүгэ, Саха сирин норуоттарын ааптардарын айымньыларын тарҕатыыга, тылбаас дьыалатын сайыннарыыга уонна саха литературатын кэҥэтиигэ олук ууруллар.
Нина Сутакова.