Бүгүн Бэрдьигэстээххэ «Үрдэл» түөлбэ (салайааччы Светлана Лю-Фа) оҕо былаһаакката саҥа спортивнай тренажерынан хаҥатынна.
Ол курдук, Бэрдьигэстээх дьаһалтата, түөлбэ дьоно-сэргэтэ Президент фондатын Граныгар «Тулуурдаах, сымса, күүстээх буолуохпун баҕарабын» диэн бырайыагы көмүскээн, үлэҕэ киллэрдилэр.
Тэрээһин үөрүүлээх түгэнигэр Дьокуускайтан «Тимир» СК (салайааччы Игнат Чомчоев) тренердэрэ, ГТО нуорматын туттарыытын көҕүлээччилэр Михаил Чупров уонна Айсен Охлопков оҕолорго сөпкө дьарыктанарга сүбэ-ама биэрдилэр. Бэйэлэрэ штанганан, гиирэнэн, гантелынан, саҥа оҥоһуллубут тэриллэргэ ханнык упражнениелары оҥоруохха сөбүн көрдөрдүлэр.
Ааттаах-суоллаах спортсменнарбыт тылларын-өстөрүн оҕолор олус болҕомтолоохтук иһиттилэр. Сыыһаларын-халтыларын биллилэр. Маннык уопуттаах дьон бэйэлэринэн кэлэн, баҕалаах ыччакка ыйан-кэрдэн, көрдөрөн биэрэллэрэ икки өттүттэн туһалаах буоларыгар саарбах суох.
«Үрдэл» түөлбэ салалтата тэрээһиҥҥэ көхтөөхтүк кыттыбыт оҕолорго, төрөппүттэргэ, ыалдьыттарга, өрөспүүбүлүкэтээҕи ГТО нуорматын туттарыы киинин начаалынньыгар Ариян Александровка махталларын биллэрэллэр.
Вячеслав Алексеев