Бүгүн Солоҕоҥҥо үгүс дьон биһирэбилин ылбыт “ССРС-тан төрүттээхпит” диэн аҕам саастаах дьоҥҥо аналлаах сайыҥҥы сынньалаҥ лааҕыра үлэтин саҕалаата.
Бу анал бырайыак быһыытынан арыллыбыт лааҕыр иккиc сылын ыалдьыттары көрүстэ. Бырайыагы «Самородок» кэмиэрчэскэйэ суох тэрилтэ Президент Гранын быһыытынан 852 174, 60 солк. ылары ситиспитэ. Бастакы сезоҥҥа оҕо саастарын санаан-ахтан ылаары Үөһээ Дьааҥыттан, Томпоттон, Алдантан, Уус Алдантан, Мэҥэ Хаҥаластан о.д.а. улуустартан оччотооҕу кэмҥэ улааппыт, пионер үрдүк аатын сүкпүт дьон улууспут сиригэр-уотугар кэлэн, күөх сайыны туһалаахтык атаарыахтара.
Ыалдьыттарга анаан тэрийээччилэр аралдьытар куоҥкурустары, күрэстэри бэлэмнээн олороллор. Ол курдук, үҥкүү, ырыа, баян, цифровой билии-көрүү үөрэхтэрин биэриэхтэрэ. Көрдөөх-нардаах оонньууларга, спортивнай күрэхтэһиилэргэ күөн көрсүөхтэрэ уонна сүрүннээн урукку кэми ахтан-санаан ылан, ирэ-хоро сэһэргэһиэхтэрэ.
Быйыл Сэбиэскэй Сойуус саҕана, Аан дойду үрдүнэн киэҥ сураҕырбыт “Артек” оҕо лааҕыра тэриллибитэ 100 сылын туолла. Онно Горнайтан элбэх үөрэнээччи сылдьан олохторугар умнуллубат үтүө өйдөбүлү хаалларбыттара саарбаҕа суох.
Бүгүҥҥү бэлиэ тэрээһиҥҥэ бастакы сезон иитиллээччилэрин СӨ ыстаарсай пионер баһаатайа, Надежда Крупская уордьан хаһаайката, ыччат хамсааһынын бэтэрээнэ Людмила Оконешникова, улуус, нэһилиэк салалтата эҕэрдэлээтилэр.
“ССРС-тан төрүүттээхпит” лааҕыр үлэтэ ситиһиилэх, элбэх иитиллээччилэрдээх буоллун диэн баҕа санаабытын тириэрдэбит. Бырайыак иккис сезона от ыйын 27 күнүттэн саҥа дьону-сэргэни ыҥыран, үлэтин салгыыр.
Вячеслав Алексеев