2024 сылга Бэрдьигэстээххэ сотовай сибээс салона түөкүттэргэ албыннатан, 3 мөлүйүөнүн сүтэрбитэ.
Саха сиригэр полиция үлэһиттэрэ түөкүттэр албыннааһыннарын арыйда. Санатан эттэххэ, 2024 сылга Бэрдьигэстээххэ баар сотовай сибээс салонун филиала 3 мөл. солкуобайы сүтэрбитэ.
Силиэстийэ быһаарбытынан, 2024 сылга биллибэт киһи салон менеджерыгар эрийэн, бэйэтин үлэһитинэн ааттаан, төлөбүр бырагырааматын бэрэбиэркэлиир курдук сымыйанан этэн, тэрилтэ харчытын бэйэтин счетугар ыыттарбыта.
Оперативнай-розыскной үлэ кэмигэр холуобунай розыск үлэһиттэрэ 37 саастаах Санкт-Петербург олохтооҕор тахсыбыттар. Кинини ааспыт сыл олунньутугар атыы-эргиэн киинигэр уорбут харчытын картаттан устаары кыммытыгар туппуттар. Киниттэн мобильнай төлөпүөннэри уонна 240-тан тахса баан каартатын былдьаан, буруйдааҕы Саха сиригэр аҕалбыттар.
Кэлин дьыаланы тэрийбит киһи эмиэ биллибит – кини 36 саастаах хас даҕаны криминальнай дьыалалаах ити уобалас олохтооҕо эбит. Кини киһитэ тутуллубутун билэн, дьиэтин уонна телефонун сим-карталарын уларыта-уларыта саһа сылдьыбыт. Быйыл тохсунньуга кинини Ленинград уобалаһыгар куортамнаан олорор дьиэтигэр булбуттар.
Силиэстийэ быһаарбытынан, кинилэр эрдэттэн оруолларын үллэстэн үлэлээбиттэр: биирэ сибээс салоннарын контактарын көрдөөччү уонна харчыны устааччы, иккиһэ үлэһиттэргэ эрийэн, бэйэтин IT-исписэлииһинэн эбэтэр куттал суох буолуутун сулууспатын бэрэстэбиитэлинэн ааттаммыт. Уорбут харчы сороҕо баан каарталарын төлөбүрүгэр барбыт, хаалбытын кинилэр бэйэ-бэйэлэрин икки ардыларыгар үллэстибиттэр. Тэрийээччи уорбут харчынан техника, массыына атыыласпытын уонна кредитын иэстэрин саппытын билиммит.
37 саастаах киһиэхэ холуобунай дьыала суукка ыытыллыбыт. Кини доҕоро хаайыыга баар, силиэстийэ салҕанар, буруйу оҥоруу атын түбэлтэлэрэ быһаарыллар, – диэн иһитиннэрэр Саха Өрөспүүбүлүкэтин ИДЬМ иһитиннэрэр.
Күннэй Алексеева бэлэмнээтэ,
Хаартыска интэриниэт ситимиттэн.