Саамай элбэх ороскуоттаах бөрөнү
1924 с. 2-с Одуну нэһилиэгэр дьааттаан, 200 сүөһүнү, табаны сиэбит бөрөнү өлөрбүттэрэ. Ол бөрө аҕыйах күн иһигэр Мытаах нэһилиэгин 50 табатын тардыбыта.
Сэрии иннинэ
1938 с. «Саха АССР бастыҥ булчута» ааты ылбыт, республикатааҕы Бочуот дуоскатыгар тахсыбыт булчуттар:
Николаев Алексей Кириллович – «Саҥа хардыы» холкуос, 161 бырыһыан толорбут.
Семенов Николай Семенович – Калинин аатынан холкуос, 173 бырыһыан толорбут.
Петров Петр Ильич – «Кыһыл сардаҥа» холкуос, 168 бырыһыан толорбут.
1936 с. бултаммыт:
Тииҥ – 9044, кырынаас – 9118, солоҥдо – 13, саһыл – 46, бөрө – 6, нэтээги – 3064, куобах – 99, кырса – 3, моҕотой – 91694, күтэр – 35160, дьабара – 3922.
Элбэх булчуту үөрэппит
1940 с. 2-с Атамай Сталин аатынан холкуоһун 63 саастаах булчута Михаил Михайлович Винокуров 4249 с. суумалаах түүлээҕи бултаабыт, былаанын 393 бырыһыан толорбут. Кини 20-тэн тахса үчүгэй булчуттары иитэн таһаарбыт. «Булчут туйгуна» значогунан наҕараадаламмыт.
Бастыҥ булчут дьахтар
1944 с. Маалтааны нэһилиэгин бастыҥ булчута Егорова Мария Григорьевна 350 тииҥи, 2 саһылы о.д.а элбэх кыра түүлээҕи бултаан, 1800 солк. туттарбыта. Хас да төгүл бириэмийэлэммит. Кини эһэни кытта бултуура.
Стахановец булчут
1945 с. «Кыым» хаһыат Горнай оройуонун биллиилээх булчута Николай Семенович Семенов туһунан суруйбута. Киниэхэ стахановец булчут аата иҥэриллибит, «САССР чулуу булчута» диэн ааты ылбыт. 50 сыл бултаабыт. Октябрь бырааһынньыгар диэри 300-чэкэ тииҥи өлөрбүт.
Булчут дьахтар
1945 с. Ньурбаҕанчына нэһилиэгин Калинин аатынан холкуос сылгыһыта Марина Егорова сүрүн үлэтин таһынан, 2 саһылы, 4 кырынааһы, 50 тииҥи өлөрөн, кооперативка туттарбыт.
Муҥхалаах Арыппыана
Сэттэ оҕолоох Аграфена Андреевна Жиркованы Күөрэлээххэ күн бүгүнүгэр диэри «Муҥхалаах Арыппыана» диэн ытыктаан, истиҥник санаан ааһаллар. Сэрии ыар, аас-туор сылларыгар элбэх дьону кини абыраабыта. Күөрэлээх тулатынааҕы күөллэри муҥхалыыра, Дьөгүөр Эбэтигэр тиийтэлиирэ. Кини туостан уу баһар ыаҕастары эрэ буолбакка, араас кээмэйдээх ыаҕыйалары, тымтайдары, тууйастары оһуордаан, симээн тигэрэ.
Атын оройуоҥҥа
1949 с. оройуон 370 кадровай булчуттан 192 булчуту атын оройуоҥҥа бултата ыыппыттара: ол иһигэр Кэбээйигэ 30, Алдан хайысхатыгар 162 булчуту.
44 бөрөнү
1959 с. бөрө сиэһиниттэн оройуоҥҥа ааспыт сылга 44 ынах сүөһү, 300-чэкэ таба, уонунан ааҕыллар сылгы ороскуоттаммыта. 4 ый иһигэр 44 бөрө өлөрүлүннэ.
Саамай элбэх куобах
1966 с. 12692 тииҥ, 1802 кырынаас, 36106 куобах, 142 солоҥдо, 405 андаатар, 57 кыһыл саһыл тириитэ тутуллубут.
1961-69 сс. куобах хойуутук үөскээбитэ. Атамайга киномеханик Константин Иннокентьевич Семенов Тумааскай Бадыһал икки ардынан Дьүктүөнэ үрдүгэр омурҕан курдук ытыалаан, 78 куобаҕы өлөрөн турар.
Ол саҕана Маҥкыйга олохтоох Никифор Дмитриевич Черноградскай, туһахтарыттан биир кэрийиигэ, 119 куобаҕы ылбытын туһунан кэпсииллэрэ.
Саамай элбэх тайаҕы
Ленин аатынан опытнай-көрдөрүүлээх хаһаайыстыба кадровай булчута Гаврил Дмитриевич Степанов 38 сыл бултаабытыгар (1961 с.) барыта 300-тэн лапа тахса тайаҕы, 12 эһэни, 6 бөрөнү өлөрбүт, муҥутаан биир кыһын 12 саһылы өлөрбүт.
Чыпчаал – XX үйэ /»Үлэ күүһэ» редакцията. Бэчээккэ В.И.Алексеев бэлэмнээтэ. Дьокуускай, 2006 – 52.
Уруһуй интэриниэт ситимиттэн туһанылынна.