Бүгүн «Бэргэн» СК бэрт сонун, сэргэх күрэхтэһии буолла. Ол курдук, стрелковай комплекска «Дартс» көрүҥүн сэргээччилэр бастыҥ ааты былдьастылар. Дьокуускайтан, Маҕарастан, Бэс Күөлүттэн, Аһыматтан, Бэрдьигэстээхтэн кэрэ аҥаардарга 17, эр дьоҥҥо 14 киһи бэйэтин күүһүн холонно.
Күрэхтэһиини буулдьанан ытыы тренердэрэ Герасим Дьяконов уонна Марк Никифоров иилээн-саҕалаан ыыттылар. Кинилэр бу күрэхтэһиигэ бэрт элбэх киһи кыттыбытыттан соһуйдубут, үөрдүбүт дииллэр. Биир бэйэм улууспутугар спорт бу көрүҥэ улаханнык биһирэммэт дуу дии саныырым. Онтум олох атын хартыына буолла. Спортсменнар бары кэриэтэ анал быраҕар «дротиктаахтарынан» сылыктаатахха, элбэх киһи «дартсы» сэргиир эбит. Тэрилтэбитигэр, дьиэбитигэр сыалы быраҕаттыы сылдьабыт. Дьиэҕэ элбэх миэстэни ылбат, дьарыктаннаххына үчүгэй көрүҥ дэһэллэр. Баҕалаах дьон элбэх, онон инникилээҕэ көстөр.
«Большой раунд» уонна «сектор 20» көрүҥнэр түмүктэринэн, кэрэ аҥаардарга бастакы миэстэни Наталья Иванова, иккиһи Зинаида Платонова, үсүһү Марфа Федорова ылла.
Эр дьоҥҥо, бастакы Афанасий Дмитриев, иккис Марк Никифоров, үһүс Федор Иванов буолла.
Дьокуускайга олорор биир дойдулаахтарбыт Афанасий Дмитриев, Федор Иванов саҥа саҕалааччы дьоҥҥо сүбэ-ама биэрдилэр. Хайдах табыгастаах оонньуохха сөбүн көрдөрдүлэр.
Тэрийээччилэр спорт бу көрүҥэ сайдарыгар улахан эрэллээхтэр. Инникитин күрэхтэһиилэри ыытан, дьону түмэн өрөспүүбүлүкэ таһымыгар ситиһиилээхтик кыттарга үлэлэһэр былааннаахтар.
Тэрийээччилэр сонун күрэхтэһии өрө көтөҕүллүүлээхтик ыытылларыгар өйөбүл буолбут Олимпийскай эрэллэри бэлэмниир өрөспүүбүлүкэтээҕи спортивнай оскуола, физическэй култуура уонна маассабай спорт сайдыытын киинин салалтатыгар махталларын тириэрдэллэр.
Вячеслав Алексеев