Мин 1997 с. төрөппүттэрбэр – эбээ Маайа саамай кыра кыыһыгар бастакы оҕонон күн сирин көрбүппүн. Эбээ Маайа миигин бастаан түөрт ыйдаахпар ийэбинээн Мытаахтан күүлэйдии кэлбиппитигэр, сүүспэр күлүнэн бэлиэтээбит. Уон алтыс сиэн эбиппин. Ол онтон ыла эбээлиин алтыһыым саҕаламмыт. Орто дойду кэрэтин, күнүн сырдыгын көрөөрү ыксааммын аҕыс ыйдаахпар төрөөбүппүн. Дьэ, ол иһин эбээм миэхэ дууһатын сылааһын, тапталын иҥэрэн, улаатыахпар диэри көрөн-истэн харайар, бүөбэйдиир.
Бэрдьигэстээххэ мин түөрт саастаахпар, Чурапчыттан көһөн кэлбиппит. Эбээ Маайа оччолорго эдьиий Илииһэлээххэ олорор этэ. Биһиги эмиэ кинилэр улахан дьиэлэригэр олорсубуппут. Эһээтэ суох буолан, күтүөппүн эһээ Барыыс диэн билиҥҥээҥҥэ диэри ыҥырабын. Таһырдьа тахсар үктэл, улахан дьоҥҥо анаммыт буолан, кыайан кирилиэһин тахсыбакка, охторум элбэҕин иһин, эбэм эһээ Барыыска ойоҕос өттүнэн миэхэ анаан, элбэх үктэллээх кирилиэс оҥотторбут. Хойукка диэри Күннэй кирилиэһэ диэн ааттанан, кыра сиэннэр туһаммыттара.
Кэлин эдьиийдээхтэн чугас уопсай дьиэҕэ көспүппүт. Эбэм аах эмиэ дьиэлэрин оҥостон тахсыбыттара. Инньэ гынан төттөрү-таары сылдьыһан, көмөлөсүһэн олорбуппут. Алын кылааска үөрэнэ сылдьан, эбэбэр хоно тахсарбын саамай кэтэһэр түгэним буолара. Сарсыарда туран ханнык хааһыны сиирбин, киэһэттэн сакаастаан утуйарым. Гречка хааһыны буһаттарар буоллахпына киэһэ ыраастаан бэлэмнээн биэрээччибин. Сарсыарда сып-сылаас хааһыны ороммор аҕалан биэрэрин, телевизорга мультик көрө-көрө сиэн лобуйан кэбиһэрим. Билигин санаатахпына, наһаа да атаахтатар, бүөбэйдэһэр эбит.
Кыһын томороон тымныыга үөрэх буолбатаҕына эбэбэр тахсарым. Оһох иннигэр табахтыы олордоҕуна, уһун кыырыктыйбыт баттаҕын тарааммын өрөн биэрэрим. Оһохпутун отто-отто ас астыырбыт, хаартылаан да ыларбыт. Радионы, телевизоры холбоон сонуннары истэрбит. Хайаан да сахалыы хаһыатттары аахтарара. Миэхэ дьиэҕэ үлэбин толорорго көмөлөһөрө, ордук ахсаан предметигэр.
Алын кылааһы бүтэрбит сайыммар эбээ Маайа, эдьиийдэр Люба, Таня уонна сиэннэр: мин, Алеша, Андрейка Ивановтар буолан, “Механик Кулибин” теплоходунан устаммыт, Өлүөнэ очуостарын – Саха сирин биир кэрэ сэдэх көстүүтүн көрөн, астынан-дуоһуйан кэлбиппит. Эбээ Маайа сөҕөн-махтайан, хойукка диэри саныыра. Айаны наһаа тулуйарын билигин сөҕө саныыбын.
Аҕыс сааспыттан эбэбиттэн ас астыырга үөрэммитим. Иккис сменаҕа үөрэнэр этим, дьонум үлэлии сылдьаллара. Биирдэ дьиэ телефонун нөҥүө сымыыты буһарарга үөрэттэ, онтубун сиэн баран оскуолабар бардым. Ол кэнниттэн ирииһи, бисквити буһарарга үөрэппитэ. Онтон ыла кыра кыралаан ас астыырга үөрэммитим. Студенныыр сылларбар эбэм үөрэҕэ туһалаабыта аҕай.
Сайын каникулларга, бырааһынньыктарга сиэннэр эбээ киэҥ-куоҥ тиэргэнигэр мунньустаммыт сүүрэн-көтөн, волейболлаан, футболлаан да биэрэрбит. Итинник күргүөмүнэн оонньооботохпутуна бырааһынньыгынан ааҕыллыбат курдуга.
Сэттис кылаастан волейболунан күүскэ дьарыктаммытым. Тренерым Елена Николаевна этэ. Оскуола, улуус, өрөспүүбүлүкэ күрэхтэһиилэригэр кыттарым. Эбээ Маайа ыраах күрэхтэһиигэ барарбар анаан, алаадьы буһаран этэҥҥэ күрэхтэһэн кэллин диэн уотун алаадьынан алгыыра. Уонна айаҥҥа суолгун аһатаар диэн, илиибэр туттаран ыытара.
2011 с. дьонум ПМК-ҕа дьиэ туттан көспүппүт. Эбээ наһаа да үөрбүтэ. Сотору-сотору кэлэн билсэн, көрөн-истэн барара, хоноро даҕаны. Оскуолабын бүтэрэн 2015 с. Дьокуускайдааҕы медицинскэй колледжка үөрэнэ киирбитим. Студенныыр сылларбар эбээ биһиэхэ кыстаабыта. Эбэбин көрөөрү ахтан ахан кэлэрим. Кэлээт хоонньугар киирэммин, кууһан баран утуйан хааларым.
2018 с. медсестра идэтин ылан, дипломмун бастакынан эбэбэр аҕалан илиитигэр туттарбытым. Барахсаным үөрбүтэ аҕай: “Күннэйим үлэһит буолбутугар тиийдим”, – диэн. Билигин Дьокуускайдааҕы Национальнай киин оҕо пульмонологиятын салаатыгар үлэлии сылдьабын.
Эбээ Маайа үтүө, эйэҕэс санаата, киэҥ дууһата, амарах сүрэҕэ, дириҥ таптала, минньигэс аһылыгын кытта табаҕын буруотун сыта, дьоллоох оҕо сааһым сырдык-сылаас умнуллубат өйдөбүлэ буолан хаалбыт.
Күннэй Кириллина, сиэнэ, СӨ национальнай медицинэ киинин оҕо пульмонологиятын отделениетын мед-сиэстэрэтэ.
Дьокуускай к. 2021 с.
«Арамаан Маайата» кинигэттэн.