Тохсунньу 13 күнүгэр Россияҕа Бэчээт күнүн чэрчитинэн улуус баһылыгын бастакы солбуйааччыта Сардаана Стручкова суруналыыстары кытта көрсүстэ. Сардаана Стручкова «Үлэ күүһэ» редакцияҕа, «Бэрдьигэс» телестудияҕа, «Дабаан» араадьыйаҕа, Россия Почтатыгар айымньылаах, үтүө түмүктээх үлэлэрин иһин махтанна, өрүү да бу курдук бииргэ үлэлииргэ ыҥырда.
Бу күн 2025 сыл түмүгүнэн «Үлэ күүһэ» хаһыат кылаабынай редактора Күннэй Алексеева Ил Түмэн Бочуотунай Грамотатынан наҕараадаланна.
Солоҕон нэһилиэгин дьаһалтата, кыраайы үөрэтэр музей, «Кырачаан ымыылар», «Олоҥхо кэскилэ» оҕо уһуйааннара, Семен Данилов аатынан Бэрдьигэстээх орто оскуолата, Бизнес инкубатор, М.С.Егоров аатынан Сынньалаҥ киинэ «Бастыҥ үлэлээх госпабликтарынан» ааттаннылар.
Ону таһынан, «Үлэ күүһэ» хаһыакка 2026 с. сурутууга куоҥкурус түмүгэ таҕыста. Общественнай корреспонденнар ортолоругар сурутууну ыытаннар I миэстэ-Сардана Дормидонтова (Солоҕон), II-Мария Осипова (Маҥаны), III-Мария Ноговицына (Одуну) буоллулар. «Бастыҥ почтальон» куоҥкуруспутугар I-Александра Мауленова, II-Лена Андреева, III-Светлана Леонтьева кыайыылаах таҕыстылар.
Бу курдук, улууспут соҕотох хаһыатын сурутууга дьону көҕүлүүр, бииргэ үлэлэһэр дьоммутугар махтанан туран, кыайыылаахтары харчынан бириэмийэлээтибит.
Саҥа сылга «Үлэ күүһүгэр» сурутуу туруоруллубут былаанын толорон, өрөспүүбүлүкэҕэ бастыҥнар кэккэлэриттэн сылын аайы түспэтигэр, эһиги үлэҕит сүрүн тирэх буоларын үрдүктүк сыаналыыбыт. Ол курдук, Почтанан 2026 сылга хаһыаппытыгар 644 киһи сурутан олорор. Атын элбэх нэһилиэнньэлээх улуустарга, Мэҥэ Хаҥаласка 829 (32932 нэһилиэнньэтэ), Уус Алдаҥҥа 697 (22012), Сунтаарга 685 (22228) киһи улууһун хаһыатыгар суруппут. Онон инник улахан улуустары кытта инники күөҥҥэ сылдьарбыт улууспут улахан ситиһиитинэн, дьоммут-сэргэбит хаһыаты ааҕарынан, өйүүрүнэн сыаналыыбыт. Өрүү бу курдук, «Түмсүүнэн-кыайыыга», «Горнайдар-Чыпчаалга» диэн девизтээх иннибит диэки, ситиһиилэргэ хардыылаан иһиэххэ.
Ону таһынан, ааспыт сыл түмүгүнэн «Сахабэчээт» ыыппыт «Тыл күүһэ» куоҥкуруһугар «Үлэ күүһэ» киин улуустар икки ардыларыгар “Быстыҥ социальнай ситим” номинацияҕа III миэстэ, техническэй редактор Светлана Винокурова өрөспүүбүлүкэтээҕи “Сыл бастыҥ таһаарыыта” куоҥкуруска дипломант буоллубут. Ситиһиибитин үөрэн туран үллэстэбит.
Күндү биир идэлээхтэрбитин, убаастыыр бэтэрээннэрбитин, общественнай корреспонденнарбытын Бэчээт күнүнэн, «Үлэ күүһэ» хаһыаппыт ааҕааччыларын, социальнай ситиммит подписчиктарын үүммүт саҥа сылынан итиитик-истиҥник эҕэрдэлиибит!
Күндү ааҕааччыларбыт, бу биир сыл иһигэр бары иллээх ыал курдук, сонун -нуомас кэпсэтэн, санаа-оноо үллэстэн, суруйан-бичийэн, күлэн-үөрэн халыҥ түмсүү буолбуппутуттан ис сүрэхтэн үөрэбит, махтанабыт.
Эһиэхэ барыгытыгар дьиэ кэргэттэргитигэр, тус бэйэҕэтигэр чөл, доруобай буолууну,ситиһиилээх үлэни,уостубат тапталы, күн сиригэр баар бары кэрэни, уһун дьоллоох олоҕу баҕарабыт.
«Үлэ күүһэ»