Бэрдьигэстээххэ «Олорор дьиэ уонна куорат эйгэтэ» бырагыраама чэрчитинэн, «Ыраас уу» диэн бырайыак олоххо киирэн, ууну ыраастыыр саҥа ыстаансыйа 38-х кыбаарталга баар 7 дьиэни ыраас уунан хааччыйан олорор.
Ол курдук, олох-дьаьах усулуобуйатын тупсарар үлэ салгыы «Эбэ» түөлбэҕэ ыытыллар. Саҥа уу ситимигэр бу түөлбэҕэ 137 ыал холбонор кыахтаныа. Санатар буоллахха, уу ситимин киллэрии үлэтин «Саха АТ» хампаанньа ылсан үлэлиир.
Билиҥҥи туругунан уопсайа бу түөлбэҕэ 6 300 миэтэрэ усталаах сиргэ полиэтиленовай турбалары ууруу үлэтэ тэтимнээхтик бара турар.
Бу күннэргэ «Эбэ» түөлбэ олохтоохторугар, сырдатыы, билиһиннэрии мунньаҕа буолла.
Улуус, нэһилиэк баһылыктара Никита Андреев, Алексей Аргунов, туһааннаах исписэлиистэр уо.д.а кыттыыны ыллылар. Билиҥҥи туругунан 27 ыал дуогабардаһан олорор. “Эбэ” түөлбэ олохтоохторун көрдөһүүлэринэн, ыал аайыттан 150 тыһ.солк. бу сыл устата, 5 ыйга үллэрэн 30 тыһ. солк. төлүөххэ сөбүн туһунан этиини өйүүллэрин иһитиннэрдилэр. Бу биллэн туран, нэһилиэнньэ дьонугар-сэргэтигэр улахан өйөбүл буолара саарбахтаммат.
Маны таһынан, дьиэ күрүөтүгэр дылы кэлбит уу холуодьаһыттан, дьиэҕэ дылы тардыныы өҥөтүн, туһааннаах подрядчикка туспа төлөнөрүн быһаардылар. Ол сыаната төһө турба, матырыйаал туттулларыттан тутулуктааҕын эттилэр.
Уу киирдэҕинэ түөлбэ олохтоохторо иһэр, туттар ууларын субсидиялаах сыананан төлүүр кыахтаныахтара. Ол эбэтэр, быйылгы сыана 200 лиитэрэ ууга, 33 солк. тэҥнэһэрин эттилэр. Маннык тарыыбынан 38 кыбаартал олохтоохторо туһанан олороллор.
«Уу олох тыына» диэн мээнэҕэ этиллибэт, олох-дьаһах усулуобуйата чэпчииригэр туһуламмыт бырайыак, толору олоххо киирэрин өйөөн-өйдөөн, бу хаалбыт аҕыйах ыйдарга, түөлбэ олохтоохторо уу ситимэ киирэр тэтимин түргэтэтэн биэриэххэ диэн ыҥырабыт.
Нина Сутакова