Бу сайын айан дьоно-сэргэтэ Кировскай, Кэбээйи суолларын аартыктарыгар ураты оҥоһуулаах бэлиэлэр турбуттарын көрөн ааспыт буолуохтааххыт.
Дьэ, бу туох ытык бэлиэ турбутун «Кировскай нэһилиэгэ» тыа сирин түөлбэтин баһылыгын солбуйааччытыттан Саргылана Аргуноваттан билистибит:
– Маннык үтүө бачыымы биир дойдулаахпыт, олохтоох дьаһалтаҕа өр сыл исписэлииһинэн үлэлээбит Евдокия Леонтьева көтөхпүтэ. Ол курдук 2023 с. «Үс аан» диэн ааттаан-суоллаан, сурукка тиһэн олохтоох дьаһалта баһылыгар Савва Иннокентьевичка киллэрбитэ. Чахчы да, кэскиллээх этии тутатына өйөнүллэн, сайын нэһилиэкпит кыраныыссатыгар үс сиринэн Бэрдьигэстээххэ Куочалыга (197 км.) , Маҥаныга Күҥкүйгэ (278 км), Октябрьскайга «Кырамдаҕа» турдулар.
Ол курдук, алгысчыт, көрбүөччү Дария Романова-Сиэллээх Сэгэйэ сүбэтинэн-аматынан, ис кутун иэйиитинэн
эскизтэммитэ. Турар сирин-уотун анаан талан биэрбитэ.
Маныаха улахан үлэни харысхал бэлиэлэри, муус оҥоһуктары оҥорор маастар Леонид Афанасьев олус кичэллээхтик оҥордо, чочуйда.
Айан суолун харысхала дириҥ ис хоһоонноох. Бэлиэтин икки өттүнэн бытырыыс курдук ойуулар, суол уһунун ( км) ыйаллар. Үөһээ өттүгэр Айыылартан айдарыллыбыт үс куппут, тирэхпит көстөр. Ортотугар чуораннара, дэйбиирдэрэ суол аартыгын алгыыр, ыраастыыр суолталаахтар», – диэн сиһилии сырдатта.
Үс ытык эбэлэр тардыыларын ситимниир, уһун айан аартыктарын, оргууй тыал суугунун сиккиэринэн, хобо чуорааннар лыҥкынас тыастара барар, кэлэр айан дьонун харыстыы, алгыы туруохтун.
Нина Сутакова