Бүгүн Бэрдьигэстээххэ улуустааҕы остуол тенниһин федерациятын бэрэссэдээтэлэ Валентин Петров бирииһигэр күрэхтэһии ыытылынна.
Сүрүннээн Афанасий Парфенов аатынан спортивнай комплекска дьарыктанааччылар кытыннылар.
Сыралаах киирсиилэр түмүктэринэн, бастакы миэстэни Петр Александров, иккис Василий Алексеев, үһүс Андрей Васильев буоллулар.
Алын финалга инники күөҥҥэ Надежда Уразбахтина таҕыста. Кини кэнниттэн убайдыы-быраат Алексей, Евгений Наховтар иккис-үһүс миэстэни үллэһиннилэр.
Кинилэргэ барыларыгар Валентин Анатольевич анал бириистэринэн — Байанай бэлэҕинэн утары уунан, соһуччу үөрдүлэр-көттүлэр.
Маны таһынан эмиэ тус бэйэтин аатыттан анал бириистэри туттартаата.
Аны кэлэр нэдиэлэҕэ Россияҕа остуол тенниһин күнүгэр аналлаах күрэхтэһии тэриллэрин иһитиннэрдэ. Үчүгэйдик бэлэмнэнэргэ ыҥырда.
Спортсменнар остуол тенниһин мэлдьи өйүүр АМПКиС салалтатыгар махталларын тириэрдэллэр.
Василий Алексеев