Ааспыт өрөбүллэргэ Дьокуускайга хапсаҕайга Петр Алексеев сырдык аатыгар анаммыт өрөспүүбүлүкэтээҕи күрэхтэһии түмүктэннэ. Манна аны сайын Тааттаҕа ыытыллыахтаах XXII Манчаары оонньууларыгар спорт бу көрүҥэр кыттар иһин, хас ыйааһын ахсын 10 путевка оонньонно.
Икки күн устата 36 хамаанда, 290 спортсмен уон бастыҥ иһигэр киирэр иһин, кытаанах хапсыһыылары көрдөрдүлэр.
Горнай бөҕөстөрүттэн ордук табыллан, бэтэрээннэрбит туһуннулар. Ол курдук, 60 кг Спиридон Васильев, 70 кг Альберт Васильев уонна 90 кг Геннадий Габышев Ытык Таатта сиригэр улуустарын аатын көмүскүүр кыахтаннылар. Инникитин, уон иһигэр киирбэтэх атын уолаттарбыт Эҥсиэли Хочотун күрэхтэһиитигэр хаалбыт путевкалар иһин киирсиэхтэрэ.
Вячеслав Алексеев