Дьиэ-уот коммунальнай хаһаайыстыбатын Горнайдааҕы филиала уһун кыстыкка бэлэмнэнии үлэтин тэтимнээхтик ыытар. Ититии барар ситимнэрин көрүү-истии, мөлтөх туруктаах турбалары саҥардыыга күүскэ ылсан, кыһыннары саахал тахсыбатын туоратарга бары кыһамньытын уурар.
Бу күннэргэ Федот Андреев салайааччылаах саахалы туоратар биригээдэ уолаттара элбэх дьон олорор дьиэлэригэр, «38» кыбаарталга, иһэр уу магистралын саҥардыыга үлэлии-хамсыы сылдьаллар. Инники ууруллубут тимир турбалар биллэ эргэрбиттэр. Саҥардалларыгар бөҕө-таҕа, ууттан-хаартан эмсэҕэлээбэт, үйэлээх полиэтиленовай турбалары туһаналлар.
Уолаттар сэттэ дьиэҕэ номнуо турбаларын тардан бүтэрбиттэр. Турбалар ититии ситимин үрдүгэр ууруллубуттар. Билигин тымныыттан харыстыыр анал матырыйаалынан бүрүйүү үлэтин ыыталлар. Барыта 692 м. кэриҥэ турба тардылынна. Кыбаартал олохтоохторо быыстала суох иһэр уунан хааччыллалларыгар улахан болҕомтону уурар туһааннаах тэрилтэ үлэһиттэригэр махталларын тириэрдэллэр.
Вячеслав Алексеев