Хас сылын ахсын ыытыллар СӨ Бырабыыталыстыбатын отчуота Горнай улууһуттан саҕаланна. СӨ Култууратын миниистирэ, биһиги улууспут куратора Афанасий Ноев салайар бөлөҕө Маалтааны, Маҥаны олохтоохторун кытары көрсөн, СӨ Ил Дархана Айсен Николаев, СӨ Бырабыыталыстыбата 2024 с ыыппыт үлэтин, инники соруктарын туһунан кэпсээтэ.
Кини улууспут өрөспүүбүлүкэҕэ бастыҥнар кэккэлэригэр сылдьарын бэлиэтээтэ. Горнай улууһун баһылыга Никита Андреев хамаандата дьонун-сэргэтин туһугар кыһамньылаах үлэни ыытарын киэн тутта эттэ.
Баай историялаах Маалтаанылар төрүт үгэстэрин, дойдуларын аатын ытыктаан, убаастаан, үрдүктүк тутан үүнэр көлүөнэҕэ хаалларан иһэллэригэр махталын биллэрдэ. Саҥа сынньанар киин тутулларыгар баҕа санаалааҕын мустубут дьон сэргии, астына ылынна.
Кэптиҥҥэ дьон биирдиилээн көрсүһүүгэ кэккэ боппуруостарын быһаарыстылар.
Эльвира Егорова, оҕо саадын үлэһитэ:
— Киин хочуолунайтан тэйиччи олорор буолламмыт, сылааска кыайан холбонор кыахпыт суох. Кыамтата кыра үһү.
Уолум СВО-ҕа ытык иэһин толоро сылдьар. Оһох отторго ыарырҕатабыт. Онон ханнык чэпчэтиилэр баалларын, атын ханнык ньыманан дьиэбэр ититии ситимин киллэриэхпин сөбүн интэриэһиргэстим.
Жанна Багбекова:
— Аҕам саастаах дьон эмтэнэригэр, сынньанарыгар ханнык санаторий өҥөтүнэн туһаныахпын сөбүн билистим.
Ону таһынан, дьиэбэр ититии ситимин киллэрэргэ ханнык докумуоннар ирдэнэллэрин, хаһан киириэн сөбүн ыйыттым.
Власий Андреев, бааһынай хаһаайыстыба салайааччыта:
— Быйылгыттан саха ынахтарын көрөр базовай хаһаайыстыбалаах дьоҥҥо көрүллэр үп-харчы сарбыллыбыта сыыһа диэн эттим.
Раиса Алексеева, оҕо саадын үлэһитэ:
— Егоровтар дьиэ кэргэн ититии ситимигэр холбонорго туруорсубуттара хаһыс да сыла буолла. Наһаа уһаан эрэр. Бу кэмҥэ уоллара СВО-ҕа Ийэ дойду көмүскэлигэр сылдьар. Онон кинилэр боппуруостарын уһаппакка быһаарыллара буоллар. Биһиги нэһилиэкпитигэр хочуолунайа кыамтата кыра, ол иһин иккис хочуолунай дуу, эбэтэр кыамтата улаатыан наада дуу дии саныыбыт. Ону таһынан, уу ситимин тардыы үлэтэ ыыттылларыгар этиилээхпит.
Оҕо саадын өрөмүөнүн ыытар наадалаах. Сынньылаҥ киинэ саҥардылларыгар баҕа санаалаахпыт. Оптоволокно ситимэ Бүлүү улууһун хайысхатыттан кэлэр. Сотору-сотору алдьанан моһуоктуур.
Дмитрий Луковцев, биэнсийэлээх:
— Үүт харчыта үрдүө дуо? Сир оҥоруутугар улахан болҕомто ууруллуохтааҕын санатабын. Тиэхиньикэ уматыгын сыаната күн ахсын ыарыы турара, олох сайдыытыгар улахан охсуулаах. Тыа хаһаайыстыбатын сайдыытыгар ыччаттар ылсалларыгар сөптөөх үлэ барара наада. Сир баайа норуот баайа буоларын умнар сатаммат. Тыа сиригэр быраас тиийбэт. Онон үөрэҕи бүтэрбит, идэтийбит оҕолору тыа сиригэр ыыталыахха сөп этэ. СӨ Бырабыыталыстыбата бөлөҕө тыа сиригэр кэлэригэр, хас нэһилиэк ахсын тыа хаһаайыстыбатын министиэристибэтин үлэһитэ хайаан да баар буолуон наада.
Вера Новикова, элбэх оҕолоох ийэ:
— «Мин бастакы хамнаһым» бырайыак туһунан сэргии иһиттим. Итиннэ оҕону үлэҕэ угуйар туһуттан, 14 сааһыттан буолбакка, 12-13 саастаах оҕолор эмиэ хамнастаналларыгар сокуон эппиэттиирэ буоллар, тыа сиригэр туһалаах этэ.
Гаврил Григорьев, учуутал:
— Биһиги нэһилиэкпититтэн ырааҕа суох сиргэ гаас утаҕын буллулар. Онно «Газпром» тэрилтэтэ үлэ ыытара былааннанар. Онон биһиги нэһилиэкпитигэр, Маҥаныга, Илбэҥэҕэ күөх төлөн киириэн сөп курдук дии.
Билигин оҕолор 35 саастарыгар диэри ыччат дэнэллэр. Оттон үөһээ саастаах дьон эмиэ да ыччат, эмиэ да саастаах дьоҥҥо киирсибэттэр. Араас субсидияларга, көмөҕө хапсыбакка хаалаллар. Боппуруос хаттаан көрүллүөн сөп дуу.
Түмүккэ, Афанасий Ноев түгэнинэн туһанан олохтоох самодеятельность көхтөөх кытыылаахтарыгар Сахайаана Тарабукинаҕа, Алла Григорьеваҕа, Аида Чемезоваҕа, Нонна Варламоваҕа СӨ култууратын миниэстиэристибэтин Махтал суруктарын туттарда.
Ону таһынан, аҕам саастаах дьоҥҥо Мария Алексееваҕа Владимир Сидоровка, Николай Сидоровка сэмэй бэлэхтэрин уунна.
Вячеслав Алексеев