Бырабыыталыстыба отчуотун бөлөҕө күн иккис аҥаарыгар Октябрьскайга үлэлээтэ. Улуус баьылыгын бастакы солбуйааччыта Сардаана Стручкова салайыытынан, аан бастаан «Айыы түһүлгэтэ» түмэл дьиэҕэ сырыттылар. Нэһилиэк олоҕун төрдүттэн билистилэр. Отчуокка нэһилиэнньэ көхтөөхтүк кыттан, туһааннаах ыйытыктарын биэрэн, хоруйдары ыллылар.
Ол курдук бастакы уочарат үүт харчыта кэмигэр түспэтэ этилиннэ. Октябрьскай дьаһалтата ППМИ бырагырааманан таһаарыылаахтык үлэлиирин, сөптөөхтүк туһанарын сырдатта. Маннык хайысхалар үлэни тэтимирдэн биэрэллэрин ыйан туран махтаннылар.
Быйыл судаарыстыбаттан көрүллэр бүддьүөт кыччаабыта тыа дьонун долгутар. Олохтоох Сынньалаҥ киинэ хапытаалынай өрөмүөн барара уолдьаспытын эттилэр. От тиэйиигэ айанын ороскуотугар көмө субсидия быйыл көрүллэрин ыйыттылар.
Аны сайын Кэбээйигэ Олоҥхо ыһыаҕа ыытылларынан, айан суолугар тохтоотулар. Ол курдук «Кырамда» муостатын өрөмүөнүн туруорсаллар. «Хаарбах туруктаах дьиэттэн көһөрүү» бырагырааманан тутуллубут үс этээстээх дьиэ балкона суоҕун ыйан туран, хаһан ситэ тутулларын ыйыттылар. Доруобуйа харыстабылын бастакы наркома Евграф Федоров аатын үйэтитиигэ, улахан болҕомто ууралларыгар көрдөстүлэр.
Өртөөһүн хааччаҕар санааларын син-биир этиннилэр. Аҕыйах ахсааннаах оскуолаҕа, оҕо уһуйааныгар, оскуола-сад тутуутугар тохтоотулар. Оскуола иһинэн үлэлиир төлөбүрдээх тракторист, суоппар идэлэрин баһылыыр оҕо, улахан дьон ахсаана эбиллэрин эттилэр. Ол курдук, дьиэнэн хааччыйыыга 30 миэстэлээх интэринээт тутуутугар этии киллэрдилэр.
Сайдыыны түстэһэр тыа туруу үлэһит дьонугар СӨ Култуураҕа уонна Духуобунай сайдыыга миниистирэ Афанасий Иванович Махтал суруктары үөрүүлээх быһыыга-майгыга туттарда.
Быйыл Ойуун Ууһа төрүттэммитэ 170 сылын көрсө нэһилиэк баһылыга Алексей Петров ыалдьыттары, биир дойдулаахтарын эҕэрдэлээн туран, Афанасий Ивановичка ыҥырыы суругу туттарда.
Төрүт дорҕоону үйэтитээччи импровизатор, музыкант Айсен Кысылбаиков кырыымпаҕа доҕуһуолунан, СӨ үтүөлээх артыыһа Эрхан Николаев дириҥ ис хоһоонноох ырыаларынан уонна СӨ култууратын үтүөлээх үлэһитэ,
Олоҥхо тыйаатырын артыыһа Яна Ньургусова иэйиилээх олоҥхото, истээччилэри олус сэргэхситтэ, сүргэлэрин көтөхтө.
Нина Сутакова