Дьокуускайга Саха сирин үөнэнээччилэрин ортотугар ыытыллыбыт “Спортивные Якутяне” спартакиада үөрүүлээх түһүмэҕэ буолла. Үөрэх дьылын устата ыытыллыбыт улахан күрэхтэһиигэ өрөспүүбүлүкэбит бары улуустарын оскуолалара бастыҥ ааты былдьастылар. Оҕолор спорт 29 көрүҥэр илин-кэлин түсүһэн, кыайыы туһугар бары сыраларын уурдулар.
Горнайдар II бөлөххө Амма, Чурапчы, Таатта, Уус Алдан, Өлүөхүмэ, Үөһээ Бүлүү, Жатай эдэр спортсменнарын кытары тэҥҥэ кииристилэр. Бүгүҥҥү түмүк быһаарыытынан, биһиги улууспут хамаандата Чурапчы кэнниттэн пьедестал иккис үктэлигэр тахсан, анал Кубогынан наҕараадаланнылар. Үһүс миэстэни Үөһээ Бүлүү ылла.
Санатан эттэххэ, ааспыт сылга биһиги хамаандабыт үһүс буолан турар. Быйыл биир тутум үрдээн тахсыбыттара элбэҕи этэр.
Спорт 29 көрүҥүттэн Горнай оҕолоро национальнай многоборьеҕа, самбоҕа, хотугу многоборьеҕа, “вызов первых” боруонса, оҕунан ытыыга, дуобакка үрүҥ көмүс мэтээллэммиттэрэ. Атын көрүҥнэргэ да көрдөрүүбүт куһаҕана суох. Барытыгар наадалаах очукуоларын аахсан, хамаандабыт үс бастыҥ иһигэр киирдэ.
Спортсменнарбыт ситиһиилээхтик кытталларыгар улуус, спортивнай оскуола, үөрэх кыһаларын салалталара, тренердэр, төрөппүттэр улахан болҕомтону ууран, ситиһии кэллэҕэ диэн махтаныах, эҕэрдэлиэх тустаахпыт.
Вячеслав Алексеев