Бүгүн Одунуга Атамайтан айдарыылаах, Одунуттан оҥоһуулаах тыл үөрэхтээҕэ, учуонай, тыл билимин дуоктара, бэрэпиэссэр Лука Никифорович Харитонов төрөөбүтэ 125 сылыгар аналлаах өрөспүүбүлүкэтээҕи форум үрдүк тэрээһиннээх ыытылынна. Кэрэчээн кыргыттар ыалдьыттары алгыстаах алаадьынан эҕэрдэлии көрүстүлэр.
Тэрээһин үөрүүлээх арыллыытыгар эҕэрдэ тыллар этилиннилэр. Оҕолор музыкальнай нүөмэринэн киэргэттилэр.
Тэрээһиҥҥэ СӨ Ил Дарханын уонна Бырабыыталыстыбатын дьаһалтатын Тыл сайдыытын боппуруостарын сүрүннүүр управлениетын салайааччыта, тыл билимин кандидата Римма Жиркова, СӨ култууратын миниистирэ Афанасий Ноев, тыл билимин доктора Николай Ефремов, ХИФУ Хотугулуу-Илиҥҥи омуктар тылларын уонна култуураларын институтун дириэктэрэ Гаврил Торотоев, Лука Харитонов аймаҕа суруйааччы Степан Сивцев—Хамалҕа уо.д.а кытыннылар. Тэрээһиҥҥэ саха тылын сарсыҥҥытын, кэскилин түстэһэр учууталлар, иитээччилэр муһуннулар.
Бу түһүлгэҕэ маастар-кылаастар, быыстапкалар, үс хайысханан секциянан үлэлэр быыстала суох ыытылыннылар. Педагогтар айымньылаах үлэлэрин көрөн сөхтүбүт, биһирээтибит. Оҕолор төрөөбүт тылларын билэллэрин туһугар араас интэриэһинэй остуол оонньууларын, аудио диискэлэри, дидактическай материаллары толкуйдаан оҥорбуттар.
Кыттааччылар «Төрүт тылы үөрэтиигэ саҥа көрүүлэр, саҕахтар» Төгүрүк остуолга санааларын аһаҕастык үллэһиннилэр, идеяларын эттилэр. Сахалыы эйгэни тэрийиигэ, оҕону кытта кэпсэтии үөрүйэҕэр, патриотическай иитиигэ, төрөөбүт тылы харыстааһыҥҥа, күннээҕи туттуллар тылларга, айымньыны үөрэтиигэ сүрүн болҕомтолорун уурдулар.
Төрөөбүт тылбыт инникитэ хас биирдиибититтэн тутулуктааҕын өйдүөх тустаахпыт. Этиллибит сыаллар-соруктар туолалларын туһугар айымньылаахтык үлэлиэҕиҥ.
