Бу күннэргэ Дьокуускайга Олимпийскай чемпион Павел Пинигин бирииһигэр көҥүл тустууга “Саха сирин тимир суоллара” АК Бүтүн Россиятааҕы турнира ыытылынна. Киэн туттар киһибит күрэхтэһиитигэр Кыргызстан, Тыва, Бурятия, Дагестан, Чечня, Ингушетия о.д.а. хамаандалар, барыта 1000 кэриҥэ эдэр бөҕөс, “Триумф ” көбүөрүгэр таҕыста.
16 саастарыгар диэри уолаттарга Бэрдьигэстээххэ Олимпийскай эрэллэри бэлэмниир өрөспүүбүлүкэтээҕи оҕо спортивнай оскуолатын иитиллээччилэрэ Вячеслав Лаптев боруонса, Эйнар Максимов үрүҥ көмүс мэтээли ылары ситистилэр.
Улахан саастаах уолаттарга өссө биир боруонса мэтээли Михаил Леонтьев аҕалла. Вадим Константинов бэрт кыранан үс бастыҥ иһигэр киирбэтэ. Тренер Антон Захаров күрэхтэһии биир бастыҥ судьуйатынан ааттанна.
Санатан эттэххэ, бу улахан уолаттарбыт аҕыйах хонугунан Тааттаҕа Манчаары оонньууларын көбүөрүгэр тахсан, бастыҥ аатын былдьаһыахтара. Эдэр кэскиллээх бөҕөстөрбүтүгэр ситиһиилэри баҕарыаҕыҥ.
Вячеслав Алексеев