Бүгүн Горнайга олохтоох бэйэни салайыныы күнүн чэрчитинэн «Биир Ньыгыл Россия» Бүтүн Россиятааҕы политическай партия форума ыытылынна.
Дойду сайдыытын туһугар ыкса үлэлэһэр «Биир Ньыгыл Россия» партия киэҥ хабааннаах үлэни ыытар.
Кэлиҥҥи биэс сыл устата улууспут хайдах курдук киэркэйбитин, бигэ туруктаммытын, дьон-сэргэ олор усулуобуйата биллэ тупсубутун бары билэ-көрө сылдьабыт. Онно сүрүн олугу, өйөбүлү «Биир Ньыгыл Россия» партията уурарын киэн тутта бэлиэтиибит, махтанабыт.
Бэлиэ тэрээһиҥҥэ «Биир Ньыгыл Россия» ВПП регионнааҕы салаатын исполкомун бэрэссэдээтэлэ Надежда Селютина ыалдьыттаата. Кини улуус олохтоохторун эҕэрдэлээн туран, партия ылыммыт норуодунай бырагырааматын хайысхатын билиһиннэрдэ. Биир бэлиэ түгэнинэн Надежда Селютина «Биир Ньыгыл Россия» саҥа чилиэннэригэр партийнай билиэттэрин туттарыыта буолла. Партия саҥа кыттыылаахтарыгар норуот туһугар үлэлииллэригэр эрэнэрин эттэ.
Көрсүһүү кыттыылаахтарын СӨ Бырабыыталыстыбатын бастакы солбуйааччы Дмитрий Садовников, улуус баһылыга Никита Андреев, бастакы солбуйааччы Сардаана Стручкова, депутаттар Сүбэтин бэрэссэдээтэлэ Маргарита Константинова эҕэрдэлээтилэр. Дойдубут сайдыытын түстүүр сүрүн Партиябыт үлэтэ тахсыылаах буоларыгар норуот өйөбүлэ улахан суолталааҕын эттилэр.
«Биир Ньыгыл Россия» ПП Горнайдааҕы салаатын сэкирэтээрэ Алексей Аргунов улууска ыытыллыбыт үлэни сырдатта.
«Биир Ньыгыл Россия» эппиэтинэстээх дьоно Россия бигэ туруктаах, көмүскэллээх буоларыгар СВО-ҕа төрөөбүт дойдуларын туһугар олохторун толук уурбут, сулууспалыы сылдьар буойуттарбыт күндү, тапталлаах ийэлэригэр «Аҕа дойдуну көмүскээчи Ийэтэ» мэтээли туттарбыттарын, дьон сүһүөхтэригэр туран көрсөннөр, сүгүрүйэллэрин биллэрдилэр. Ону таһынан, өрөспүүбүлүкэ сайдыытыгар үтүө суобастаахтык үлээбит дьону Махтал суругунан, анал бэлиэнэн сыаналаатылар.
Вячеслав Алексеев