Бу нэдиэлэҕэ Бэрдьигэстээххэ остуол тенниһин спордун бэтэрээннэрэ сотору кэминэн Кстово куоракка ыытыллыахтаах Россия чемпионатыгар кыттарга бэлэмнэнии дьарыгы бардылар.
Чөл олоҕу, спорду өрө туппут ытык дьоммут Афанасий Парфенов аатынан СК сүүмэрдиир бэлэмнэниигэ туох баар кыһамньыларын ууран туран, Радомир Сидоров салалтатынан дьарыктаннылар.
Ыалдьыттарбыт Бэрдьигэстээххэ атаарбыт күннэрэ улахан түһүлгэҕэ тиийдэхтэринэ, туһалаах буоларыгар саарбахтаабаттар. Күҥҥэ иккитэ дьарыктанан, сынньанан санаабытын ситтибит дэһэллэр. Бэрдьигэстээх нэһилиэгин баһылыгар Алексей Аргуновка, табаарыстарыгар Радомир Сидоровка махталлара муҥура суох.
Түмүк дьарыктар кэннилэриттэн Радомир Сидоров көҕүлээһининэн, улууспут теннисистэрин ортотугар аһаҕас күрэхтэһии буолла.
Өрөспүүбүлүкэ аатын көмүскүү барар дьону тургутуон баҕалаах киһи аҕыйаҕа суох буолла. Ол эрэн, аҕам саастаах дьон эдэрдэргэ ыарахан «таһаҕас» буоллулар. Баай уопут диэн тугун көрдөрдүлэр. 80-с хаардарыгар үктэммит Антонина Герасимова, Мария Кудаисова күн бүгүҥҥэ диэри бэйэлэрин саастарыгар сылбырҕатык хамсана сылдьалларыттан киһи сөҕөр, махтайар. Үтүө холобур эрэ оҥостобут.
Күрэхтэһии төһө да сэмэйдик бардар, оонньуулар олус тыҥааһыннаах буоллулар.
Түмүккэ, сүрүн финалга тахсаннар, сытыы киирсиилэри ааһаннар бастакы миэстэни Василий Данилов, иккиһи Алексей Алексеев, үсүһү Радомир Сидоров ыллылар.
Алын финалга бастакы миэстэҕэ Вадим Федоров, иккискэ Антонина Максимова, үһүскэ Вячеслав Алексеев таҕыстылар.
V кылаас үөрэнээччитэ Вадим Федоров оонньуута лаппа тупсубутун бэлиэтиэххэ сөп. Кини алын финалга хотторуу хомолтотун билбэккэ, утарсааччыларын эрэллээхтик хотуталаан кыайыыны ситистэ.
СӨ хамаандатын биир күүстээх оонньооччута Василий Данилов теннистэн ураты айар, суруйар дьоҕурдаах. Хас да кинигэ ааптара. Бу күн бэйэтин оонньуутунан сөхтөрбүт Алексей Алексеевка ситиһиилэри баҕаран туран, «Арай биирдэ…» диэн бэйэтин кинигэтин бэлэх уунна.
Олохтоох спортсменнар өрөспүүбүлүкэ хамаандатын кыттыылаахтарыгар Антонина Герасимоваҕа, Елизавета Матвееваҕа, Евдокия Другинаҕа, Любовь Бесчетнова, Василий Даниловка, Радомир Сидоровка махталларын биллэрэн туран, эппиэтинэстээх күрэхтэһиигэ ситиһиилэри баҕараллар.
Вячеслав Алексеев