Тэтимнээх үйэ хаамыытынан, куйаар ситиминэн араас эгэлгэ талааннаах, дьоҕурдаах, үлэни-хамнаһы өрө тутар кэрэ аҥардары киһи сөҕө махтайа көрөр. Онуоха эдэр ыаллар бу эйгэҕэ санааларын ууран, дьиэ кэргэттэригэр үп-харчы эбинэн, дьаныардаахтык дьарыктаналларын хайгыахха эрэ сөп.
Ол курдук бүгүҥҥү сэһэргэһэр кэрэ аҥаарбытын куйаар ситимин нөҥүө билистибит. Кини биһиги биир дойдулаахпыт, Маалтааны нэһилиэгин элбэх оҕолоох эдэр ыал күн күбэй ийэтэ буолар.
Ол курдук Анна, Николай Заровняевтар 2014 с. сүрэхтэрин холбоон, төрөөбүт төрүт сирдэригэр, харыс да сири хамсаабакка тыа ыалын сиэринэн, быр-бааччы олороллор. Анна кыра уолун көрөн олорор кэмигэр бу макраме диэн дьарыгы кытта куйаар ситиминэн билсибит. Дьикти кэрэ ойуулардаах, курууһуба курдук өрүллүбүт үлэлэрэ хараҕы сылаанньыта үөрдэллэр.
«Дьиэм үлэтин үмүрү тардаат, ордук хаалар бириэмэбин, макраме өрөн атаарар буолбутум. Аан бастаан дьиэбэр панно, сибэкки ыйыыр киэргэл, гамак у.д.а оҥоһуктары өрбүтүм. Үлэлэрбин дьон-сэргэ сэҥээрэн, сакаас биэрэр буолбуттара. Онон бэйэ дьарыкпын кэҥэтэр уонна эбии дохуот киллэрэр сыалтан 2025 с. соцконтракт ылбытым.
Улууска маннык көмө баара саҥа саҕалааччыларга олус туһалаах. Сөбүлүүр дьарыкпын «Золотая Петля» (GoldenLoop) диэн ааттаан иистэнэр массыына, оверлок уонна материал ылынан, куйаар ситиминэн үлэлии олоробун.
Ол курдук Красноярскай кыраайтан өрөспүүбүлүкэ араас муннугуттан Сунтаартан, Хаҥаластан, Уус Алдантан уо.д.а улуустар сакаастыыллар. Кыһыҥҥы кэмҥэ кресло-гамактары сакаастаабат кэмнэригэр атын араас оҥоһуктары баайан атыылыыбын.
Ол курдук, кресло-гамактары, паннолары, сахалыы харысхаллары, сахалыы бастыҥа, илин кэбиһэр, суумкалар, түннүк, олоппос, лаампа сабыыларын у.д.а толкуйдаан тугу баҕараргын өрүөххэ сөп. Ис эйгэҕинэн ылынар дьарыгыҥ эргиччи туһалаах буолар», – диэн истиҥ кэпсэтиитин түмүктээтэ.
Эдэр ийэлэргэ, бэйэ дьарыгын сайыннарыан баҕалаах биир дойдулаахтарыгар «Хаһан да бириэмэ тиийбэт диэн этинимэҥ, бириэмэни сатаан туһана, атаара үөрэниҥ. Сөбүлүүр дьарыккытын сайыннарарга дьулуһуҥ, саҥа арыйыыларгытын олоххо киллэрэн иһэргитигэр баҕарабын» диэн сүмэлээх сүбэтин тириэрдэр.
Бу курдук тарбаҕар талааннаах тыа мааны ыалын тапталлаах дьарыга, алаһа дьиэ мааны киэргэлэ буолан, харыстыыр, араҥаччылыыр суолтата үрдүү, үксүү туруохтун.
Нина Сутакова