Бэс ыйын 22 күнэ – эйэлээх норуокка Аҕа дойду Улуу сэриитэ саҕаламмыт курус күнэ. Сүгүрүйүү уонна дойдуга бэриниилээх буолуу күнүгэр Улуу кыайыыны уоттаах сэрии толоонугар, тыылга уһансыбыт хорсун буойуттарбытын, эйэлээх олоҕу олохтоспут, сырдык тыыннарын толук уурбут хорсун буойуттарбытын, дьоммутун-сэргэбитин ахтар-саныыр күммүт.
Ол курдук, Бэрдьигэстээххэ улууспут 95 сылын көрсө, «Сардаҥа» түөлбэ кэрэ-бэлиэ былаһааккатыгар «Кыһыл», «Маай», «Сиэрпэ» холкуостартан 1941-1945 с.с. сэрии толоонугар ыҥырыллан барбыт хорсун буойуттарга, холкуос туруу дьонугар-сэргэтигэр анаан, историческай суолталаах өйдөбүнньүк бэлиэни, сахалыы сиэринэн, Аал уоту аһатан, үрдүк Айыылартан көрдөһөн, үөрүүлээхтик арыйдылар. Саастаах дьон этэллэринэн, Аҕа дойду Улуу сэриитигэр ыҥырыллан барбыт дьоммут, ити түөлбэ суолунан Ийэ дойду көмүскэлигэр барбыттар эбит. Ол иһин, өйдөбүнньүк сөптөөх миэстэтин булла диэн, тэрээһин кыттыылаахтара бэлиэтииллэр.
Кэскиллээх хамсааһыны, бу бөдөҥ холкуостар туруу үлэһит дьоннорун төрөппүт оҕолоро, кэнчээри ыччаттара, аймахтара уонна «Бэрдьигэстээх нэһилиэгэ” ТСТ баһылыга Алексей Аргунов олоххо киллэрдилэр.
Өйдөбүнньүк бэлиэ эскииһин Аҕа дойду Улуу сэриитин кыттыылааҕа Семен Прокопьев-I хос, хос сиэнэ Давид Лукин уонна сиэн кыыһа Варвара Лавернова оҥорон, ити кэм омоон суолларын, үйэлээх ахтыылары сиһилии билэргэ, үөрэтэргэ анаммыт куйаар кодунан көрөр гына, ситэрэн-хоторон биэрбиттэрэ олус табыгастаах буолбут.
Үлэни-эйэни айхаллаан уоттаах кыһыл кыраасканан тас көстүүтүн киэргэппиттэрэ үйэ кирбиитин сиһилии арыйар. Манна сыһыаран, бу холкуостан Ийэ дойдуларын туһугар хорсуннук сэриилэспит, олохторун толук уурбут буойуннар ааттара үйэлээх стеллаҕа суруллубуттар.
Дьоһун бэлиэ күҥҥэ Дьокуускайтан биир дойдулаахтарбыт Горнай түмсүү салайааччыта Надежда Федорова, «Кыым» хаһыат сүрүннүүр исписэлииһэ Владимир Степанов, Бэрдьигэстээх нэһилиэгин баһылыга Алексей Аргунов уо.д.а кыттыыны ыллылар.
Истиҥник саныыр, киэн туттар төрөппүттэрин, дьоннорун-сэргэлэрин, аймах-билэ дьоннорун туһунан иһирэхтик аҕыннылар, үтүө санааларын махтал тылларын тириэртилэр.
Эйэлээх олоххо сирдээбит, сайдыы суолун аҕалсыбыт аҕам саастаах көлүөнэ дьоммутугар сүгүрүйэбит. Эһиги көмүс кылааккыт, инники сайдыыбыт бигэ тирэҕэ буолан, үрдүк ситиһиилэргэ сирдии, угуйа туруохтун.
Нина Сутакова.