Солоҕоҥҥо иһэр уунан хааччыллыы боппуруоһа урут-уруккуттан сытыытык турар.
Ону учуоттаан, олохтоох урбаанньыт, бодобуос суоппара Иван Павлов дьиэ кэргэнинээн иһэр ууну ыраастыыр оборудование таҥан туруордулар.
Иһэр уу биллэн турар киһи доруобуйата чэгиэн буолуутугар улахан суолтаны ылар. Онон чугаһынан үрэҕэ, өрүһэ суох солоҕоттор биир сүрүн кыһалҕалара быһаарыллан эрэриттэн үөрэллэр. Киһи доруобуйатыгар туһалаах, бары санитарнай ирдэбилгэ эппиэттиир ууну дьиэҕэр, тэрилтэҕэр аҕалан биэрэллэрэ дэлэлээх үчүгэйий, табыгастааҕый!
Урбаанньыт саҥа саҕалааһыныгар улуус уонна олохтоох дьаһалта урбаан эйгэтин бырагырааматынан хардарыта үбүлээһиннэрэ сүрүн тирэх буолла.
Онон тыа сирин нэһилиэктэригэр маннык кэскиллээх бырайыак үлэҕэ киириитэ улахан суолталаах.
Күннэй Алексеева.