Горнай оҕолоро самбо көрүҥэр чаҕылхай ситиһиилэннилэр. Аҕыйах хонуктааҕыта Дьокуускайга Саха сирин үөрэнээччилэрин ортотугар ыытыллар «Спортивные Якутяне» спартакиада чэрчитинэн самбо көрүҥэ буолла.
Тыа сирин оҕолоругар сонун көрүҥҥэ биһиги хамаандабыт чаҕылхай ситиһиилэннэ. Тренердэр Степан Константинов, Ян Филиппов салайааччылаах спортсменнарбыт Нерюнгри, Алдан курдук күүстээх хамаандалары кытары, пьедестал үһүс үктэлин үллэһиннилэр.
Ол курдук, Горнай хамаандатыгар 42 кг Сайаана Егорова, 46 кг Надя Федотова, 55 кг Лейла Алексеева, 42 кг Кирилл Зинов, 54 кг Артур Павлов, 65 кг Кирилл Чемезов боруонса мэтээллэри ылары ситистилэр. Оттон 50 кг Никита Павлов финалга тахсан, кыл мүччү хотторон, үрүҥ көмүс мэтээл хаһаайынынан буолла.
Оҕолорбут спартакиада уопсай суотугар быһаарыылаах очукуолары аҕалан, улууспут аатын инники күөҥҥэ таһаарбыттарын бэлиэтиир наадалаах.
Вячеслав Алексеев