Физкультурник күнүн көрсө Дьокуускайга остуол тенниһигэр өрөспүүбүлүкэтээҕи турнир олус тэрээһиннээхтик барда.
Календаарынай былааҥҥа киирбит күрэхтэһиигэ Горнай спортсменнара бэркэ кытыннылар. Тэрийээччилэр спортсменнары рейтиннэринэн көрөн, саастарыттан тутулуга суох түөрт бөлөххө араардылар.
Ол курдук, IV лигаҕа сүрүн бөлөххө Василий Алексеев боруонса мэтээли ылла. Алын финалга Осип Михайлов кыайыы өрөгөйүн билэн, бэйэтигэр саҥа көрүҥү арыйда.
III лигаҕа биир дойдулаахпыт Федор Иванов, алын финалга Вячеслав Алексеев үһүс буоллулар. Гаврил Александров сүрүн бөлөххө биэс бастыҥ иһигэр киирдэ.
II лигаҕа алын финалга Валентин Петров иккис миэстэлэннэ. Петр Александров бэркэ табыллан оонньоото, өрөспүүбүлүкэ бастыҥ теннисистэригэр күүстээх утарсыыны оҥорон, сорохторун хотуталаан, 23 киһиттэн алтыс көрдөрүүлэммитин ситиһиинэн ааттыах тустаахпыт. Александр Пахомов бэһис буолан, бастыҥнар кэккэлэригэр сылдьар.
Кэрэ аҥаардарга Надежда Уразбахтина бастакы оонньууларыгар лидердарга түбэһэн, ситэри арыллыбата. Ол эрэн, санаатын түһэрбэккэ, инникитин өссө күүскэ дьарыктанан, сыыһатыгар үөрэнэн, кыайыыга дьулуһуом диэн эрэннэрдэ. Александр Кузьмин бастакы холонуутугар, астына оонньоон, элбэҕи билэн-көрөн кэллэ.
Дьокуускайга олорор биир дойдулаахтарбыт спорт бу көрүҥүнэн сөбүлээн оонньууллар эбит. Уолаттар да бааллар. Муста түстэллэр эрэ дьарыктанан, бэйэ икки ардыгар күрэхтэһии тэрийэн сэргэхсийэллэрин туһунан Владимир Павлов сонунун үллэһиннэ.
Күрэхтэһиигэ оскуола оҕолорун оонньууларын астына, көрдүбүт. Мэҥэ Хаҥаластан 1-7 кылаас үөрэнээччилэрэ спорт бу көрүҥүн баһылаабыттар. Кырабыт диэбэккэ, улахан дьонтон толлон турбакка киирсэри кытары киирсэн иһэллэр. Элбэх киһини баһыйан, кыайыы өрөгөйүн биллилэр. Икки уол алын финалга киирсэн, үрүҥ уонна боруонса мэтээл ылбыттара элбэҕи этэр. Улахан болҕомто ууруллар эбит.
Горнай теннисистэрэ Бэрдьигэстээххэ дьарыктаналларыгар бары усулуобуйаны тэрийэр, өйүүр Ыччат политикатын, култууратын уонна спордун агентствотын салалтатыгар махталларын тириэрдэллэр.
Вячеслав Алексеев