Бэҕэһээ Дьокуускайга «Дохсун» СК остуол тенниһигэр 400-кэ диэри рейтиннээх спортсменнар ортолоругар аһаҕас күрэхтэһии буолла.
Горнай теннисистэриттэн түөрт киһи бэйэтин күүһүн холонно. Бэрт сытыы киирсиини көрдөрөн, финалга диэри Валентин Петров тиийэн, үрүҥ көмүс мэтээли ылары ситистэ. Өскөтүн Валентин үрдүк рейтиннээх теннисист эбит буоллаҕына, быйыл 75 сааһын туолар, 100 тахса эрэ рейтиннээх Василий Алексеев бэрт күүстээх эдэр уолаттары хотуталаан, элбэх киһини соһутта. Кини үһүс миэстэ иһин оонньууга кыайтаран, төрдүс көрдөрүүлэннэ. Кини маннык таһымнаах күрэхтэһиигэ саӈа сүрэхтэниитигэр бэркэ кытынна. Өссө биир спортсмеммыт Петр Александров алтыс кэккэҕэ турда.
Дьокуускайга олорор биир дойдулаахпыт Владимир Павлов тохсус буолан санаатын ситтэ.
«Биир дойдулаахтарым горнайдар кэлбиттэр, кытаатыҥ», – диэн биһигини мэлдьи үөрэ-көтө көрсөр, күтүөппүт Иннокентий Андросов куһаҕана суохтук, астына оонньообутун эттэ.
Остуол тенниһин сүгүрүйээччилэрин ортотугар биир үрдүк таһымнаах күрэхтэһиигэ 43 спортсментан, Горнай түөрт теннисиһэ уон бастыҥ спортсмен иһигэр киирбитэ дьоһун ситиһии диэххэ сөп. Өссө күүскэ дьарыктанан, күрэхтэһиилэргэ кыттан, кыайыыларга дьулуһан иһиэххэйиҥ.
Спорт бу көрүӈүн күүскэ өйүүр АМПКиС кэлэктиибигэр спортсменнар махталларын тириэрдэллэр.
Вячеслав Алексеев