Бүгүн улуус баһылыга Никита Андреев улуустааҕы “Финансистар династиялара” куоҥкурус кыайыылаахтарын Федоровтары кытары көрүстэ.
Бэрдьигэстээх ытык мааны ыала Ульяна Саввина уонна Иван Федоровтар 10 оҕону төрөтөн, атахтарыгар туруоран, уопсастыбаҕа туһалаах дьон буола улаатыннартаабыттара.
Кинилэртэн Людмила Кононоваттан сиэттэрэн сэттэ кыыстан алтата олохторун үп-харчы хайысхатын кытары ыкса сибээстээн, билигин оҕолоро, сиэннэрэ Дьокуускайга, Үөһээ Бүлүүгэ улуус дьаһалтатын, бөдөҥ тэрилтэлэргэ, үөрэх хайысхатыгар, бааннарга бухгалтер, экономист, финансист үрдүк аатын сүгэн, эппиэтинэстээх боппуруостарга үлэлэһэ сылдьалларыттан киһи сөҕөр.
Идэлэригэр бэриниилээх Федоровтар сыдьааннара үп-харчы, суот-учуот хайысхатыгар уопсай 287 сыл үлэ ыстаастаахтар. Кинилэр кыайыылаах үрдүк аатын ылан, өрөспүүбүлүкэтээҕи куоҥкуруска кыттарга бэлэмнэнэ сылдьаллар. Ситиһиилэри баҕарабыт.
Вячеслав Алексеев