Бэҕэһээ Семен, Софрон Даниловтар ааттарынан Духуобунас киинигэр аҕам саастаах дьон 2024 с. түмүктүүр култуурунай-спортивнай спартакиадаларын саҕалыыр үөрүүлээх тэрээһин ыытылынна. Күрэхтэһии кыттыылаахтарын улуус баһылыга Никита Андреев, улуус депутаттарын Сэбиэтин бэрэссэдээтэлэ Маргарита Константинова эҕэрдэлээтилэр. Холобур оҥостор үтүө дьоммут, Горнай сайдыытыгар киллэрсэр кылааттара, сүбэлэрэ-амалара төрөөбүт дойдубут бигэ туруктаах буоларыгар улахан суолталааҕын бэлиэтээтилэр.
Аҕам саастаах дьон 2024 с. устата араас таһымнаах куоҥкурустарга, күрэхтэһиилэргэ ситиһиилээхтик кыттан, улуустарын дуорааннаахтык ааттаттылар. Үлэлэрэ өссө сайдарын туһугар Граннары, бырайыактары көмүскээн, онно тирэнэн төрөөбүт дойдулара бигэ туруктаах буоларыгар бары кыһамньыларын ууралларын киһи хайҕыан эрэ сөп.
Улуус салалтата бастыҥ үлэлээх дьоммутунан киэн тутталларын этэн туран, анал бэлиэлэри, Махтал суруктары туттардылар. Ол курдук, улуус социальнай-экономическай сайдыытыгар киллэрбит кылааттарын иһин Махтал суругунан Кировскай нэһилиэгин бэтэрээннэрин Сэбиэтин бэрэссэдээтэлэ Маргарита Иванова, Одунуттан үлэ бэтэрээнэ Клара Данилова, Маҥаныттан Анатолий Александров, Солоҕонтон Дмитрий Степанов, Октябрьскайтан Сидор Ковров наҕараадаланныллар.
Сааһын тухары улуус үбэ-харчыта бигэ туруктаах буоларыгар үтүө суобастаахтык үлэлээн-хамнаан кэлбит, спорт бэтэрээнигэр Анна Жирковаҕа “СӨ үп уорганын бэтэрээнэ”, Мария Андрееваҕа “Үп-харчы, экономика эйгэтигэр үтүөтүн иһин” анал бэлиэлэри дохсун ытыс тыаһан ортотугар туттардылар.
Улуус баһылыгын бастакы солбуйааччы Сардаана Стручкова ыытыллыбыт үлэни, инники былааннары билиһиннэрдэ уонна нэһилиэк спортсменнарыгар Горнай улууһун анал спортивнай форматын бэлэх уунна. Бу сылтан аҕам саастаах дьон бары күрэхтэһиилэргэ Горнай аатын көрдөрөр таҥастанан-саптанан ситиһиилэрэ өссө үрдүө диэн эрэнэбит.
Күн иккис аҥаарыгар аҕам саастаах дьон Бэрдьигэстээххэ Олимпийскай эрэллэри бэлэмниир спортивнай оскуола спортивнай саалатыгар түмсэн, буулдьанан ытыыга, баскетбол мээчигин корзинаҕа киллэриигэ, дартска, футбол мээчигин тэбиигэ, эстафетатаҕа илин-кэлин түстүлэр. Күрэхтэһии кыттыылаахтарыгар улуустааҕы бэтэрээннэр Сэбиэттэрин бэрэссэдээтэлэ Любовь Пахомова махтанан туран, ситиһиилэри баҕарда.
Бары даҕаны кыра эрдэхтэриттэн үлэҕэ-хамнаска буһан-хатан улааппыт, физкультураны, спорду өрө тутар дьон буолан, хас биирдии көрүҥҥэ тыҥааһыннаах күрэстэһиини, кыайыыга дьулуурдарын көрдөрөн сөхтөрдүлэр.
Биирдиилээн көрүҥнэргэ үс бастыҥ иһигэр киирдилэр:
“Буулдьанан ытыы”: I миэстэни Бэрдьигэстээх (Анна Протопопова, Сергей Барашков), II Солоҕон (Розалия Григорьева, Владимир Ефремов), III Кировскай (Анна Тимофеева, Николай Андреев) ылла.
“Дартс”: I Кировскай (Софья Романова, Василий Кононов), II Бэрдьигэстээх (Анна Кириллина, Родион Николаев), III Одуну (Жоржетта Текеянова, Василий Максимов).
“Бэргэн футболист”: I Бэрдьигэстээх (Тамара Леонтьева, Владимир Максимов), II Одуну (Оксана Афанасьева, Александр Оленов), III Мытаах (Алевтина Белолюбская, Андрей Сивцев).
“Бэргэн баскетболист”: I Солоҕон (Марина Павлова, Виктор Тимофеев), II Мытаах (Екатерина Николаева, Ким Заровняев), III Октябрьскай (Анна Стручкова, Владимир Охлопков).
“Эстафетаҕа”: I Бэрдьигэстээх, II Солоҕон, III Одуну
Уопсай түмүккэ, кыайыылаах үрдүк аатын Бэрдьигэстээх хамаандата ылла. Иккис-үһүс миэстэни Солоҕон уонна Одуну үллэһиннилэр. Күрэхтэһии бастыҥнара Кубогынан, мэтээллэринэн наҕараадаланнылар.
Спортивнай күрэхтэһииттэн ураты, нэһилиэктэр бэтэрээннэрин Сэбиэтин бэрэссэдээтэллэрэ Улуу Кыайыы 80 сылыгар аналлаах бырайыактары көмүскээтилэр. Дьүүллүүр сүбэ болҕомтотун тардан, “Бэтэрээннэрбит хорсун быһыыларын суолларынан”диэн үлэни билиһиннэрэн Октябрьскай Марфа Федорова бастакы, “Улуу кыайыы 80 сыла” бырйыагынан Атамайтан Виктория Заровняева иккис, “Сүдү Кыайыы өйдөбүнньүктэрэ” диэн үлэни Маалтааныттан Дмитрий Луковцев оҥорон, үһүс миэстэни ылла. Тэрээһин бастыҥнара Саха сиригэр “Уһун үйэлэнии” бырайыактан үбүлэнэн 50-30-20 тыһ. солк. наҕараадаланнылар.
Үтүө холобур буолар дьоммут сааһырдыбыт диэн бүгэн олорбокко, төрөөбүт дойдуларын сайдыытын, бигэ туруктаах буолуутун туһугар көхтөөх кыттыыны ылалларынан киэн туттабыт, махтанабыт.
Вячеслав Алексеев