Элбэх хайысхалаах спортивнай комплекска, үс күн устата боксаҕа оҕолорго Афанасий Парфенов аатынан күрэхтэһии үрдүк тэрээһиннээхтик ыытыллан түмүктэннэ. Барыта 201 эдэр боксер тыҥааһыннаах киирсиини көрдөрөн, дьон биһирэбилин ылла. Афанасий Ильич 80 сааһын көрсө, кини аатын сүгэр Бэрдьигэстээх спортивнай саалатыгар анал стендэ турбута, үтүө киһи аата үйэтитиллэ туруо.
Горнай эдэр спортсменнара үчүгэй өйдөбүлү хааллардылар. Бокса күрэхтэһиилэригэр Бэрдьигэстээхтэн ураты Орто Сурт, Аһыма, Күөрэлээх оҕолоро кэлэн кыттыбыттара кэрэхсэбиллээх. Ити сэлиэнньэлэргэ бэйэлэрин кэмнэригэр рингэҕэ тахсан, бокса спордун эттэригэр-хааннарыгар иҥэриммит Андрей Оленов, Николай Николаев бэриниилээх үлэлэрэ буолар диэн бэлиэтиэх тустаахпыт.
Горнай боксаҕа оскуолатын иитиллээччилэриттэн “А”, “Б” бөлөхтөргө үс бастыҥ иһигэр киирдилэр: I миэстэни 28 кг Алекс Вензель, 34 кг Исмаил Новрузов, 38 кг Дьулус Данилов, 42 кг Арылхан Босиков, II 22 кг. Эрчим Кардашевскай, 30 кг Авдей Вензель, 40 кг Коля Налесник, Лилиана Никифорова, III Ефрем Чемезов, Леонард Андреев, 28 кг Семен Сидоров, 34 кг Данил Кириллов, 36 кг Давид Оленов, 48 кг Герман Захаров, 52 кг Мирон Оленов, 48 кг Кэскил Варламов, 50 кг Артем Андреев, 63 кг Май Гуляев, 67 кг Максим Павлов ыллылар. Тренердэр Валентин Аргунов, Семен Румянцев, Борис Сидоров.
Күрэхтэһиигэ олус элбэх киһи бириис туруорбутун тэрийээччилэр астына бэлиэтээтилэр. Оҕо спордун өйүүр дьоҥҥо махталларын тириэртилэр. Горнайга бокса оскуолатын ааспыт, Александр Агеевка дьарыктаммыт уолаттар туора турбатахтарын киһи астына бэлиэтиэн сөп. Ол курдук, араас сылларга улуус аатын улахан күрэхтэһиилэргэ ааттаппыт спортсменнарбыт, норуоттар икки ардыларынааҕы кылаастаах, ССРС спордун маастардара, спорт маастарыгар кандидат буолары ситиспит Артур Ложников, Андриан Андреев, Николай Охлопков, Григорий Лукин, Вахид Гадимов, Николай Павлов, Владимир Аввакумов бэйэлэрэ көҕүлээн, эдэр боксердар киирсиилэрин үрдүктүк сыаналаан, анал бириис туруоран үөртүлэр.
Бастыҥ спортсменнары Ил Түмэн депутата Владимир Поскачин эҕэрдэлээтэ. Талааннаах уолаттары бэлиэтии көрбүтүн эттэ. Күүскэ дьарыктаналларыгар сүбэлээтэ. Афанасий Ильичтын алтыһан, бииргэ тахсыылаахтык үлэлээбиттэрин истиҥник ахтан-санаан ылла.
Үчүгэй бэлэмнэээхх кэлбит Алексей Тимофеев, Дима Власов «Бастыҥ киирсии», Айсен Баишев «Кыайыыга дьулуурун иһин», Владимир Сергеев, Антон Романов «Бастыҥ боксер» номинациялары ыллылар. Ону таһынан, үчүгэй киирсиини көрдөрбүт Элан Архипов, Руслан Гайдий, Алексей Алексеев, Данил Сурков, Артем Григорьев, Исмаил Новрузов, Дьулус Данилов улуус боксердарын аатыттан бириистэри туттулар. Афанасий Ильич дьиэ кэргэнэ туруорбут телевизор хаһаайынынан Артем Андреев буолла.
Вячеслав Алексеев