Сэтинньи 22 күнүгэр Атамай нэһилиэгэр оҕо саада тэриллибитэ 65 сылын бэлиэтиир үөрүүлээх тэрээһин ыытылынна. Бу күн уһуйааммытыгар үлэлээбит бэтэрээннэрбит, үлэлии сылдьыбыт кэллиэгэлэрбит, нэһилиэкпит тэрилтэлэрин салайааччылара, улуустааҕы үөрэх управлениетыттан ыалдьыттаатылар.
Улуус дьаһалтатын, үөрэх управлениетын аатыттан начаалынньык Варвара Сметанина эҕэрдэтин тириэртэ, наҕараадалары, биир идэлээх сойуустар ааттарыттан бэлэхтэри туттарда. Ол курдук, «Педагог-настаабынньык» бэлиэнэн бэтэрээн-иитээччи Екатерина Васильева бэтэрээн иитээччи, сэбиэдиссэйдии сылдьыбыт Надежда Гаврильева «Үөрэҕирии систиэмэтин бочуотунай бэтэрээнэ» бэлиэнэн, сэбиэдиссэй Диана Федорова « Оскуолаҕа киириэн иннинээҕи саастаах оҕолор сайдыыларыгар кылаатын иһин» бэлиэнэн , иитээччи Надежда Адамова СӨ Үөрэххэ уонна наукаҕа министиэристибэтин Бочуотунай грамотатынан, бэтэрээннэр Анна Павлова, Фекла Иванова, Зоя Яковлева Махтал суруктарынан бэлиэтэннилэр, үлэһит Наталья Винокурова улуус баһылыгын Бочуотунай грамотатынан, хары чаһыытынан наҕараадаланна, Махтал суругунан, «Раритеты Якутии» кинигэнэн иитээччи көмөлөһөөччүлэрэ Мария Винокурова, Виктория Яковлева, иитээччи Татьяна Яковлева наҕараадаланнылар. Өр сылларга үтүө суобастаахтык үлэлээбит профсоюзпут бэрэссэдээтэлэ Сардана Иванова Махтал сурук тутта. Атамай нэһилиэгин дьаһалтатын аатыттан Алла Павлова эҕэрдэтин тириэртэ, наҕараадатын, сэртипикээти туттарда.
Уһуйаан бэтэрээннэрэ олус истиҥ тыллардаах эҕэрдэлэрин, баҕа санааларын эттилэр. Үлэлээбит сылларын, бииргэ үлэлээбит кэллиэгэлэрин ахтан-санаан ыллылар. Саамай саастаах, 94 хаарыгар үктэммит тыыл, үлэ бэтэрээнэ Варвара Иванова кылынан кичэйэн оҥорбут олбохторун бэлэх уунна. Кини кыыһа 44 сыл уһуйаантан халбаҥнаабакка үлэлии сылдьар. Бастыҥ уопсастыбанньык Виктория Заровняева «Дьыл кэмнэрэ» кыбытык көбүөрү тигэн бэлэхтээтэ. Уран тарбахтаахтар оҥоһуктарын ыалдьыттар сөхтүлэр-махтайдылар, сэргээтилэр. Фекла Иванова бэйэтэ суруйбут хоһоонун ааҕан иһитиннэрдэ, Елена Винокурова эҕэрдэлээн туран, уһуйааммыт түмэлигэр кэргэнэ Павел Винокуров оҥорбут хомуһун бэлэх уунна. Дьааһылаҕа, детсадка өр кэмҥэ сэбиэдиссэйинэн үлэлээбит Анна Павлова долгуйан туран, бииргэ үлэлээбит кыргыттарын, билигин үлэлии сылдьар кэлэктиип үлэһиттэрин үбүлүөйдээх сылынан эҕэрдэлээтэ, кэрэни, үтүөнү баҕарда.
Нэһилиэкпит тэрилтэлэрэ эҕэрдэлэргэ кыттыһан үөрүүбүтүн үллэһиннилэр. Төрөппүт кэмитиэтин аатыттан Юлия Филиппова эҕэрдэ тыллары этэн туран, үөрүүлээх быһыыга-майгыга ДНС маҕаһыынтан сэртипикээти туттарда. Тэрээһини уһуйааммыт «Айыллаана» ырыа ансаамбыла, иитээччи Елена Иванова, иитиллэччилэрбит Сайаана Аввакумова, Айыллаана Иванова ырыаларынан киэргэттилэр. Кэлбит ыалдьыттарбыт, бэтэрээннэрбит, үлэһиттэр тэрийбит баай-талым, минньигэс астаах фуршеттарыгар тото-хана аһаан, ирэ-хоро кэпсэтэн, астына, дуоһуйа сынньанан тарҕастылар.
Диана Федорова