“Азия оҕолоро” оонньууга Горнайтан өрөспүүбүлүкэ чиэһин көмүскүөхтэрэ

Дьокуускайга “Азия оҕолоро” норуоттар икки ардыларынааҕы VIII оонньуулара саҕаланара бэрт аҕыйах хонук хаалла. Билигин киин куоракка бэлэмнэнии үлэтин үгэнэ. Саха сирин оҕолоро түөрт сылга биирдэ ыытыллар спорт бырааһынньыгар дойдуларын аатын чиэстээхтик көмүскүүргэ күүскэ бэлэмнэнэ сылдьаллар. Өрөспүүбүлүкэ хамаандатын састаабыгар Горнай эдэр спортсменнара киирбиттэриттэн биһиги үөрэбит, кинилэргэ эрэнэбит.

Ол курдук, оҕунан ытыыттан ураты, хайаҕа тахсыы спордугар Александр Агеев аатынан спортивнай оскуола иитиллээччилэрэ Дамир Алексеев уонна Тимур Егоров бааллар. Хапсаҕайга Эйнар Максимов улахан күрэстэһиини туораан киирдэ. Бэрдьигэстээххэ Олимпийскай эрэллэри бэлэмниир өрөспүүбүлүкэтээҕи оҕо спортивнай оскуолатыттан буулдьанан ытыы көрүҥэр Сюзанна Румянцева, Василий Иванов, Афанасий Егоров кыайыы туһугар туруулаһыахтара. Оҕолорбут ситиһиилэээхтик кытталларыгар тренердэрэ Василий Яковлев (хайа тахсыы спорда), Егор Никаноров (хапсаҕай), Марк Никифоров (буулдьанан ытыы) бары кыһамньыларын уураллар.

Оҕолорбут бары да кэккэ ситиһиилэрдээхтэр. Хас эмэ сыл устата дьаныардаах дьарык, былааннаах үлэ кэнниттэн туруоруммут сыалларын ситиһэн, өрөспүүбүлүкэ улахан тэрээһинигэр кытталлара, улууспут спордун биир улахан ситиһиитинэн буолар. Онон бэс ыйын 25 – от ыйын 7 күннэригэр диэри бары бииргэ түмсэн, Сахабыт сирин хамаандата инники  күөҥҥэ тахсарыгар, эдэр спортсменнарбыт туһугар бары биир санаанан ыалдьыаххайыҥ.

Вячеслав Алексеев