Александр Тарасов хоһооннорун ааҕыҥ, сэргээҥ
Баар буолуо үрдэтэр үөрүү
Кыыспар Т.А.Тарасоваҕа
Аан дойду алгыстаах куйаара
Арыаллыа, эйигин, Туйаара
Бар дьонуҥ өйөбүлэ өрүү
Баар буолуо үрдэтэр үөрүү…
Төрүт буор иҥэрэр сылааһа,
Төлкөҕүн түстэһэр былааһа
Кэмиттэн кэмигэр кэлиэҕэ
Кэрэ киэҥ кэскилгин тэлиэҕэ…
Бу сиргэ олоҕу олоруу –
Баҕарар баҕаны толоруу…
Онтун ситиһиллэр дьулууртан,
Огдолуйан барбат тулууртан…
Охсуһуу хонуута да олох
Охтон-бохтон биэримэ олох
Өбүгэҥ үгэһин үөрэтис,
Өспүтү, сүппүтү күөрэтис.
Ол буолуо аналгын толорууҥ,
Олоҕу оломноон олорууҥ…
Аан дойду алгыстаах куйаара
Арыаллыа эйигин Туйаара.
Таптыыр кэргэн киһиэхэ
Ийэ сирэ киһиэхэ
Ийэ, аҕа кэриэтэ
Сылааһынан сыдьаайар,
Сырдыгынан сандаарар…
Төрүт буор киһиэхэ
Төрүттэрин кэриэтэ
Айыылардыын арыаллыыр,
Алгыһынан арчылыыр.
Дьиэтэ-уота киһиэхэ
Дьол уйатын кэриэтэ
Дурда-хахха аатырар,
Дуулаҕа күүс-уох биэрэр.
Таптыыр кэргэн киһиэхэ
Таҥаратын кэриэтэ
Тапталынан угуттуур,
Талыы талба олохтуур…
Александр Тарасов