Бүгүн Сэмэн, Софрон Даниловтар ааттарынан Духуобунас киинигэр ааһан эрэр 2024 с. түмүктэрин таһаарар үөрүүлээх тэрээһин буолла. Үтүө үгэс буолбут тэрээһиҥҥэ бастыҥ үлэлээх дьоммут, оҕолорбут, чаҕылхай көрдөрүүлээх спортсменнар тоҕуоруһа муһуннулар.
Сылтан сыл улуус көрдөрүүтэ үрдээн иһэрэ биһигини үөрдэр. Баараҕай тутуулар ыытыллан, дьон-сэргэ олоҕо тупсарыгар ураты болҕомто уурулларын астына бэлиэтиибит. Нэһилиэктэр олохтоохторо төрөөбүт дойдулара тупсаҕай, кэрэ көстүүлээх буоларыгар бары кыһамньыларын уураллара хайҕаллаах.
Бастыҥ дьоммутун улуус баһылыга Никита Андреев, Ил Түмэн депутата Алквиад Тарасов, депутаттар Сэбиэттэрин бэрэссэдээтэлэ Маргарита Константинова эҕэрдэлээтилэр, махтаннылар. Улуус сайдыытын туһугар сүҥкэн кылааттарын киллэрбит, киэҥ хабааннаах үлэни ыыппыт дьоммут үрдүктүк сыаналаннылар.Бары хайысхаҕа ылсан, түмсэн, Горнайбыт бигэ туруктаах буоларыгар бары кыһамньыларын ууран үлэлэспит дьоммутугар махталбытын тириэрдэбит.
Улуус баһылыга Никита Андреев улууспут өссө күүскэ, тэтимнээхтик сайыннарар, дьон олорор усулуобуйатын хааччыйар туһуттан кэлэр 2025 с. инфраструктура сылынан биллэрдэ. Төрөөбүт дойдубут өссө тупса, сайда, киэркэйэ турарын туһугар бары биир санаанан ылсан, үлэлиэххэйиҥ-хамсыаххайыҥ.
Вячеслав Алексеев