Аҕа дойду көмүскээччилэрин күннэрин көрсө улууспутугар киэҥ хабааннаах тэрээһиннэр үрдүк таһымҥа ыытылыннылар.
Хас оскуола ахсын үгэс буолбут строевой хаамыылар, байыаннай-патриотическай үөрэхтэр бардылар.
Афанасий Осипов аатынан оскуола байыаннай-строевой көрүү кэмигэр биир үөрүүлээх түгэн буолла. Ол курдук, Чечня сэриитигэр ытык иэһин толоро сылдьан, геройдуу охтубут Александр Парфеновы кытары бииргэ сулууспалаабыт уолаттара, доҕотторо, 324 полка түмсүүтүн саллааттара (салайааччы Станислав Скрябин), бойобуой дьайыы бэтэрээннэрэ «Бастыҥ хамандыырга» VII «а» кылааһын үөрэнээччитигэр Толя Павловка сыаналаах бириис уонна тэрээһиннээх хамаандаҕа «Мохсоҕол» ПК оҕолоругар Өлүөнэ очуостарыгар сынньаналларыгар путевка бэлэхтээн соһуттулар, үөртүлэр.
Төһө да сыл-хонук аастар, биһиги уолбут үтүө аатын доҕотторо үрдүктүк тута, үйэтитэргэ үлэлэлэһэ сылдьалларыттан үөрэбит, киэн туттабыт, махтанабыт. Геройдар ааттара умнуллубат.
Хаартыскаҕа: VII «а» кылааһын үөрэнээччитэ Толя Павлов, педагог-организатор Евгений Слепцов
Вячеслав Алексеев