Бэҕэһээ сынньалаҥ пааркатыгар А.Н.Осипов аатынан Бэрдьигэстээх оскуолатын үөрэнээччилэрэ Виталий Жирков (4″а» кыл), Марк Платонов (4″а»), Айыына Васильева (2 «а») алҕас сарайга кыһыл таҥас кырадаһынан булбуттара 8 араас мэтээл буолбут.
Оҕолор булумньуларын быраҕан кэбиспэххэ, наадалаҕы уонна сыаналааҕы булбуттарын өйдөөн, тута төрөппүттэригэр илдьэн көрдөрбүттэр. Төрөппүттэрэ Бэтэрээн Сэбиэтигэр илдьибиттэр.
Оҕолор бу бүтүн киһи олоҕун кэпсиир, тустаахха олус күндү сыаналаах малы быраҕан кэбиспэххэ, бу кимҥэ эрэ олус наадалааҕын, күндүтүн өйдөөбүттэрэ уонна Бэтэрээн Сэбиэтигэр илдьэн биэрбиттэрэ киһини үөрдэр, элбэххэ үөрэтэр…
Бу мэтээллэр төһө өр сыппыттара биллибэт. Ол эрэн ким эрэ сүтэрбит буолуохтаах. Онон ааҕааччыларбыт билэр буоллаххытына Бэрдьигэстээххэ Бэтэрээн Сэбиэтигэр (бэрэсс. Любовь Романовна Пахомова) баран билсээриҥ.
Оҕолор маладьыастар. Афанасий Осипов оскуолатыгар патриотическай иитигэ болҕомто ууруллара маннык да түгэнтэн көстөр.
Күннэй Алексеева.