Киһи туохтан соһуйбатаҕа, тугу сөхпөтөҕө буолуой ? Бу көрүөхтэн кэрэ, сандал сааһы аҕалар соҕуруу дойду сибэккитин тюльпаны аны Бэрдьигэстээхтэн атыылаһар буолуохпут.
Бэрдьигэстээххэ Саргылана Оленова балтыларын кытта баҕа санаалара олоххо киирэн, үөрүүлэрин үллэһиннилэр.
Ол курдук бу сайын бэйэлэрин күүстэринэн кыһыҥҥы кыра дьоҕус 7×6 тэпилииссэ туттан, күөх төлөҥҥө холботторбуттар. Соҕурууттан уон араас сорт тюльпан луковицалары сакаастааннар гидропоннай лотоктарга олордон саҕалаабыттар.
«Көрүөхтэн кэрэ нарын сибэкки ууга уктуҥ да үүнэн барбат, анал көрүүгэ-истиигэ наадыйар. Ол курдук биир кэлим температураҕа, режимҥэ туруохтаах. Кини сөрүүн сири сөбүлүүр, салгын киирэрин-тахсарын ордорор. Тэпилииссэбитигэр дьиэ кэргэнинэн кыралыын-улаханныын бары саба тутан үлэлиибит. Саҥа саҕалааһын буолан, олус долгуйабыт «, – диэн дьиэ хаһаайката Саргылаана Петровна сырдатта.
Дьэ, кырдьык даҕаны бэйэбит сирбитигэр-уоппутугар силигилии үүммүт соҕуруу дойду сибэккитэ диэн саныырга да үчүгэй буоллаҕа. Бу күннэргэ «Уйгууна» маҕаһыыҥҥа атыыга тахсарын, Пятилетка 19 аадырыһыттан тэпилииссэттэн кэлэн ылыахтарын сөбүн иһитиннэрдэ. Ону тэҥэ нэһилиэнньэттэн сакаас ылаллар, Дьокуускайга атыыга тахсара былааннанар. Тюльпаннары тутатына бэлэх оҥостоллоругар суолтата да үрдүө турдаҕа.
Эдьиийдии-балыстыылар сааскы бырааһынньыктары көрсө сибэккилэрэ тиллэн, тэтэрэн эрэллэрэ хараҕы үөрдэр, дууһаны сылаанньытар.
Нина Сутакова