Бэҕэһээ Бэрдьигэстээххэ сибээс сотовай операторын маҕаһыынын консультант-атыыһыта түөкүттэргэ 2 999 000 харчыны ыытта. Биһиги редакциябыт албыннаппыт атыыһыты кытта сибээстэһэ сырытта.
24 саастаах атыыһыт Мегафон айтишниктары эрийэбит диэбиттэрин итэҕэйэн, тэрилтэ счетуттан 3 мөлүйүөн кэриҥэ сууманы аҕыйах мүнүүтэ иһигэр сүтэрдэ. Телефонунан эрийбит киһи перевод ыытар комиссиялыыр дуу, суох дуу бэрэбиэркэлиэххэ диэн атын карта нүөмэригэр операция оҥорторбут. Тэрилтэ счетуттан харчы тута кибертүөкүттэргэ барбыт. Атыыһыт өйдөөмүнэ да хаалбыт. Бу курдук түөкүттэр киһи өйүн баайалларын көр!
Атыыһыт күннэтэ тэрилтэтин үлэһиттэрин кытта удаленно кэпсэтэр, араас күннээҕи үлэни онлайн быһаарсар буолан, тута итэҕэйбит уонна түөкүн угаайытыгар киирэн биэрбит. Билигин силиэстийэ барар. Силиэстийэ ыытыллар кэмигэр атыыһыты үлэтиттэн тохтоттулар.
Улууспут олохтоохторо, бука диэн ыҥырабыт, араас нүөмэрдэри ылымаҥ, билбэт дьоҥҥутун кытта кэпсэтимэҥ, ссылкаларга кииримэҥ. Бу аттыбытыгар сылдьар дьоннор түбэһэллэр эбээт. Кибертүөкүттэр саҥаттан саҥа ньыманы айан толкуйдаан иһэллэр. Сэрэхтээх буолуҥ.
Силиэстийэ түөкүттэри булан, эппиэтинэскэ тардыа диэн эрэниэххэ.
Күннэй Алексеева