Остуол тенниһин көҕүлүүр, сайыннарар соруктаах спорт бу көрүҥүн улуустааҕы федерацията ыҥырыытынан Дьокуускайтан «Чолбон» тенниснай кулууп спортсменнара Бэрдьигэстээххэ ыалдьыттаатылар. Остуол тенниһин өрөспүүбүлүкэтээҕи федерациятын толорооччу дириэктэрэ Михаил Варламов, «Чолбон» ТК кыттыылаахтара Иннокентий Андросов, Федор Иванов кылгастык бэйэлэрин үлэлэрин туһунан билиһиннэрдилэр.
Хамаандалар бастаан 11 киһилээх «стенка на стенку» утарыта көрсүүгэ күөн көрүстүлэр. Бэрт сытыы оонньуулар кэннилэриттэн 6:5 ахсаанынан «Чолбоннор» чорбойдулар.
Биирдиилээн киирсиигэ эр дьоҥҥо финалга Валентин Петров уопуттаах Радомир Сидоровы 2:1 баһыйда. Үһүс миэстэни Олег Петров («Чолбон») ылла.
Кэрэ аҥаардарга үс бастыҥ иһигэр ыалдьыттарбыт киирдилэр. Ол курдук, Надежда Шпинева бастакы, Галина Заровняева иккис, Марина Чочанова үһүс миэстэни ылла.
Олохтоох теннистэр бэркэ табыллан оонньоотулар. Күүстээх утарсааччылары кытары тэҥҥэ киирсэн, бэйэлэригэр баай уопуту ыллылар. Маннык табаарыстыы көрсүһүүлэр ыытыллаллара спорт бу көрүҥэ сайдарыгар, элбэх киһи дьарыктанарыгар, сэҥээрэригэр сүрүн оруолу ыларын бэлиэтээтилэр.
Вячеслав Алексеев