Бүгүн Бэрдьигэстээххэ «Урбаан сылын» биир умнуллубат тэрээһинэ буолла. Ол курдук, Сэмэн Данилов аатынан Бэрдьигэстээх орто оскуолатын 8 кылааһын үөрэнээччитэ Герман Бережнов түргэнник ситэр дьиэ көтөрдөрүн иитэр, «БердСмарт» диэн бырайыагынан «Өйдөөх» фермата саҥа дьиэлэнэн, дьоҕус ферма быһыытынан үлэтин саҕалаата. Онон Герман ыра оҥостубут баҕа санаата олоххо киирдэ!
Ааҕааччыларбытыгар санатар буоллахха, Герман Бережнов түргэнник ситэр перепелка иитиитинэн дьарыгырбыта хас да сыл буолла. Араас быыстапкаларга, дьаарбаҥкаларга кини перепелкаларын дьон-сэргэ сэҥээрэр уонна перепелка сымыытын атыылаһан туһанар буолла.
Тоҕо «өйдөөх» ферма диибитий? Герман бэйэтэ кэпсииринэн оскуолаҕа сылдьар, үөрэнэр кэмигэр фермата интернет приложениянан, аныгы технологиянан бэйэтэ үлэлиир, кыылларын дьаһайар уонна хонтуруоллуур кыахтаах эбит.
Билигин «өйдөөх» фермаҕа 34 перепелка баар. Перепелкаларын сымыытын “Тэтим” маҕаһыыҥҥа атыыга туттарар, биирдиилээн ыалларга атыылыыр. Инники бу көтөрдөрүн гаражка көрөр-истэр эбит буоллаҕына, билигин туспа дьиэлэнэн, үлэтин сайыннарар былааннаах. Ферматыгар дьону-сэргэни, оҕолору ыҥыран ыалдьыттатар соруктаах.
Кырачаан фермер тугэнинэн туһанан, мэлдьи өйүүр төрөппүттэригэр махталын тириэрдэр. Ону таһынан кини бырайыагын өйөөбүт урбаанньыт Светлана Лю-Фаҕа, «Талакан» тэрилтэ салайааччытыгар Василий Николаевка, улуус баһылыгар Никита Андреевка, Семен Данилов аатынан Бэрдьигэстээх орто оскуолатын дириэктэригэр Павел Петровка, Бизнес инкубатор салайааччытыгар Александра Никифороваҕа, учууталларыгар, бииргэ үөрэнэр доҕотторугар, чугас дьонугар махтанар. Бу өйөбүл барыта оскуола үөрэнээччитэ бырайыага олоххо киирэригэр төһүү күүс буолбута саарбахтаммат.
Күннэй Алексеева