Бүгүн улууспутугар, Бэрдьигэстээх килбэйэр киинигэр «Россельхозбаан» саҥа офиска көһөр үөрүүлээх тэрээһинэ ыытылынна.
Ол курдук, «Дэлэй» атыы-эргиэн диэтин кытта сэргэстэһэ турар саҥа офиска С.Данилова уулусса 14/1, корпус Б аадырыска килийиэннэригэр баан офиһын аана тэлэччи арылынна.
«Россельхозбаан»– бу тыа сиригэр саамай табыгастаах усулуобуйалааҕынан биллэр. Баан бородуукталара тыа хаһаайыстыбатынан дьарыктанааччыларга, тыа сиригэр дьиэ туттааччыларга, атыылаһааччыларга, бөһүөлэктэри тупсаран оҥорууга, дьиэ-уот өрөмүөнүгэр чэпчэтиилээх усулуобуйалааҕын бары да билэбит, сэҥээрэбит.
Саҥа офиска клиеннарга анаан, компьютерга үлэлииргэ, отчуот толорорго, ыытарга биир хоһу анаабыттарын, олус үчүгэй усулуобуйаны тэрийбиттэрин көрөн кэлбит ыалдьыттар, эрэллээх клиеннэр олус сэҥээрдилэр, махтаннылар.
Бу күн РСХБ баан Саха сиринээҕи филиалын дириэктэрэ, биир дойдулаахпыт Василий Тимофеев бааны кытта үлэлэһэр тэрилтэлэргэ, улуус, нэһилиэк дьаһалтатыгар, клиеннэргэ Махтал суруктары, сэмэй бэлэхтэри туттарда. Онтон улуустааҕы офис салайааччыта Виктория Антонова баан аана мэлдьи аһаҕаһын, клиеннэргэ барыстаах, табыгастаах усулуобуйалаах бородуукталары сүбэлээн-амалаан биэрэргэ өрүү кыһаллалларын бэлиэтээтэ. Түгэнинэн туһанан, баан саҥа офистанарыгар күүс-көмө буолбут салалталарыгар, улуус баһылыгар Никита Андреевка, бииргэ үлэлиир кыргыттарыгар махтанна.
Бу курдук, тыа дьонугар мэлдьи чугас, эрэллээх бааммытын саҥа, сырдык, сылаас дьиэлэммитинэн эҕэрдэлээн туран, үгүс махталлаах клиеннэри, саҥаттан саҥа саҕахтары арыйан иһэргитигэр баҕарабыт.
Күннэй Алексеева