Бэрдьигэстээххэ саҥа саҕалыыр уустар батыйа оҕустулар

Бу күннэргэ Үөһээ Бүлүүттээн норуот маастара Роберт Софронов – Суор Уус Бэрдьигэстээххэ тимиринэн, маһынан уһаныан баҕалаах дьоҥҥо бэйэтин астабылын көрдөрдө, сүбэ-ама биэрдэ. Айылҕаттан талааннаах, оҥоһуктара номнуо киэҥ биһирэбилинэн туһанар киһини Горнайга тимир, мас уустаарын элбэтэр, түмэр баҕалаах Уран Куудук Дьулуур уола – Уран Уус ыалдьыттатта.

Улууспутугар тимиринэн, маһынан уһанар дьон ахсааннаах. Ол эрэн, Роберт Егоровиһы кытары билсиэн, туттарын-хаптарын көрүөн баҕалаахтар аҕыйаҕа суох киһи буолла. Суор Уус тимир уһаарыытын Петр Афанасьев мастарыскыайыгар көрдөрдө. Баҕалаах уолаттар ирэ-хоро кэпсэтэн, бэйэлэрэ охсоннор төрүттэрбит саҕаттан илдьэ кэлбит батыйаны оҥостон санааларын ситтилэр.


Ону таһынан, Роберт Егорович чороон оҥоруутун, оһуор анньыытын, ханнык инструменнары туттары көрдөрдө. Түмүккэ, үөрэҕи ааспыт уолаттарга туоһу суруктары туттарда.

Маннык маастар-кылаастары ыыталлара, уопуттаах дьон бэйэлэринэн кэлэн көрдөрөллөрө туһалаах, наадалаах уонна бэйэбит эт илиибитинэн тутан-хабан, охсон көрдөхпүтүнэ эрэ үчүгэйдик иҥэринэр буоллахпыт диэн уолаттар астына бэлиэтииллэр. Уран Куудук Дьулуур уола – Уран Уус:

“Роберт Егоровичтыын билсибиппит ыраатта. Кини өрөспүүбүлүкэ дьонугар-сэргэтигэр номнуо биллэр киһи буолар. Үгүстүк кэпсэтэбит, сүбэлэһэбит-амалаһабыт. Бу тэрээһиҥҥэ элбэх киһи сырытта. Бары олус сэҥээрдилэр. Инникитин түмсэммит, бииргэ үлэлэһэммит, оҥоһуктарбытын араас быыстапкаларга туруорар былааннаахпыт,” – диэн эттэ.

Бу кэмҥэ улууспутугар уус-уран оҥоһуктарынан дьарыгырар дьоҥҥо уопсай мастарыскыай тэрийэргэ үлэ ыытылла турар. Онон инникитин бэйэбит дьоммут оҥоһуктарын үөрэ-астына көрүөхпүт, туттуохпут турдаҕа.

Вячеслав Алексеев