Бу кэмнэргэ куйаар ситимигэр дьэрэкээн оһуордаах-мандардаах саха маанылаах мас иһиттэрин сэргии-сонургуу көрөн, кини кимин билсээри сибээстэһэ сырыттыбыт.
Сахалыы сиэринэн бэрт сэмэй, оргууйдук бэйэтин иһигэр буһан-хатан тахсыбыт, уус сыдьааннаах Бэс Күөлүттэн төрүттээх Алексей Максимовы кытта кэпсэттибит.
Эдэр сааһыттан уһанар дьарыктааҕын ааһан, тутууга сыһыаннаах буолан, улууска элбэх дьиэни дьэндэтэн таһаартаабыт үтүө кылааттаах.
Баар баара өтөн бу аҕыйах сыллааҕыта суон сураҕырар Василий Протопоповка- Сиэн Ууска анаан үөрэнэн, саха төрүт иһиттэрин оҥорорго олохтоохтук ылсыбыт. Талааннаах уус туппут-хаппыт үлэлэрэ илииттэн илиигэ бэриллэн, сир-сир аайы иһиллэр. Дьоннор бэйэлэрэ үүт-хайаҕас булан, сакаас биэрэр буолбуттар.
Онтон сиэттэрэн, билигин утумнаахтык сылы быһа сакааһынан уһанар. Бу умсугутуулаах үлэтигэр кэргэнэ Туяра Васильевна сүрүн тутаах көмөлөһөөччүтэ буолар.
Айбыт аҕата Алексей Иванович, күн күбэй ийэтэ Софья Иннокентьевна Максимовтар үлэни өрө туппут, улууспут тумус туттар дьонноро этилэр. Аҕата төрөппүттэрин батан, эмиэ уһанар эбит. Ийэтинэн эбэтэ Мария Николаевна Яковлева айылҕа маанылаабыт талааннаах иистэнньэҥэ. Элбэх ыалга илиитин сылааһынан көмөлөспүт өҥөлөөх. Алгыстаах оҥоһуктара сиэннэригэр күндү бэлэх буолан харыстаналлар.
Алексей, Туяра Максимовтар элбэх оҕолоох, кэнчээри сиэннэрдээх Бэрдьигэстээх сэлиэнньэтин мааны сис ыаллара буолаллар. Тыа ыалын сиэринэн сыспай сиэллээҕи тутан, көрөн-истэн олороллор.
Алексей Алексеевич эдэр көлүөнэ ыччакка туһаайан, саха омук баай духуобунай сыаннаһын хараххыт харатын курдук харыстаан, сүрэххитигэр-быаргытыгар иҥэрэн туран, тутан-хабан сайыннара, үйэтитэ туралларыгар ыҥырда, баҕа санаатын тириэртэ.
Нина Сутакова