Бүгүн Маҕараска мас тардыһыытыгар Аан дойду икки төгүллээх чемпиона Дьулустаан Ноговицыны, тренерин Иван Белолюбскайы чаҕылхай ситиһиилэринэн бэлиэтээтилэр.
Биир дойдулаахтаара уолларын убайдыы-быраат Контоевтар ааттарынан спортивнай комплекска уруйдуу-айхаллыы көрүстүлэр.
Бэйэлэрин эҕэрдэлэрин улуус баһылыга Никита Андреев, олохтоох дьаһалта баһылыгын солбуйааччы Василий Кривошапкин, Бэрдьигэстээх нэһилиэгин баһылыгын солбуйааччы Ксения Михайлова тириэртилэр.
Дьулустааны спорка угуйбут Иван Горохов, тренерэ Иван Белолюбскай, бастакы учуутала Айталина Пахомова үөрэҕин, спорка хардыытын, ситиһиилэрин ахтан-санаан ыллылар.
Ийэтэ Людмила Ноговицына, кырдьаҕас эдиийэ Мария Максимова-Контоева, тапталлаах кэргэнэ Виолетта Ноговицына, бииргэ төрөөбүт эдьиийэ Евгения Ноговицына дьиэ кэргэнин аатыттан махталларын биллэрдилэр.
Кэлэр өттүгэр Дьулустаан өссө күүскэ дьарыктанан кыайан-хотон, дойдутун аатын ааттатыам, биир дойдулаахтарбын үөрдэргэ дьулуһуом диэн эрэннэрдэ.
Вячеслав Алексеев