Саха норуодунай поэта Савва Тарасов 90 сыллаах үбүлүөйүн көрсө ыытыллыбыт өрөспүүбүлүкэтээҕи өйтөн суруйуу күрэһин кыайыылаахтарын ааттаатылар.
Күрэскэ Горнайтан, Сунтаартан, Дьокуускайтан, Кэбээйиттэн, Мэҥэ Хаҥаластан, Үөһээ Бүлүүттэн, Бүлүүттэн, Муоматтан, Ньурбаттан, Орто Халыматтан, Үөһээ Дьааҥыттан кытыннылар.
Күрэс экспертэрэ: Таисия Алексеева – “Кэскил” хаһыат кэрэспэдьиэнэ; Ньургуйаана Захарова -«Чуораанчык» сурунаал эппиэттиир сэкирэтээрэ; Жанна Леонтьева – «Кэскил» хаһыат консультант- эрэдээктэрэ; Варвара Окорокова – ХИФУ профессора, СӨ суруйааччыларын Сойууһун чилиэнэ; Тарасов Александр Адамович – РФ суруйааччыларын, суруналыыстарын Сойуустарын чилиэнэ, бэтэрээн учуутал.
Кыайыылаахтарынан буоллулар: 5-8 кылаас үөрэнээччилэригэр 1 миэстэ Руслан Корякин-Яковлев, 6 кылаас, Сунтаардааҕы политехническэй лицей-интернат, салайааччы Павлова Сахайа Николаевна; 2 миэстэ Дьолун Слепцов, 8 кылаас, Сунтаар №3 оскуолата, салайааччы Алексеева Анна Анатольевна; 3 миэстэ Валентин Стручков, 7 кылаас, С.И.Тарасов аатынан Өрт орто оскуолата, салайааччы Тарасова Туйара Александровна; 9-11 кылаас үөрэнээччилэригэр 1 миэстэ Сандаара Эверстова, 10 кылаас, Кэбээйи улууһун Н.П. Егоров аатынан Мастаах оскуолата, салайааччы Винокурова Луилиза Никифоровна; 2 миэстэ Василина Дмитриева , 11 кылаас, Бүлүү улууһун И.Н.Ханды аатынан Тылгыны оскуолата, салайааччы Никифорова Елена Егоровна; 3 миэстэ Тамара Чичигинарова , 10 кылаас, Дьокуускай куорат 17№ — дээх оскуолата, салайааччы Тарабукина Ирина Егоровна.
Бөлөхтөрүнэн үстүү миэстэ анаммытын таһынан, М.К.Аммосов аатынан Хотугулуу Илиҥҥи Федеральнай университеттан сертификаттар, “Кэскил” хаһыаттан, “Чуораанчык”, “Бэлэм буол” сурунааллартан, С.И. Тарасов аатынан Өрт орто оскуолатыттан, Солоҕон нэһилиэгин дьаһалтатын, Т.П.Саввинова аатынан Солоҕоннооҕу тыа сирин библиотекатыттан, университет профессора, СӨ суруйааччыларын Сойууһун чилиэнэ Варвара Борисовна Окороковаттан, Россия суруйааччыларын Сойууһун чилиэнэ, ветеран учуутал Александр Адамович Тарасовтан биһирэбил бириэмийэлэрэ туттарылыннылар.
Дьүүллүүр сүбэ эксперэ Жанна Леонтьева оҕолор үлэлэригэр сыаналабылын тиэртэ, ордук туохха болҕомтону ууруохха сөбүн быһаарда.
Күрэс түмүгүнэн С.И. Тарасов 90 сыллаах үбүлүөйүн көрсө хомуурунньук тахсарын күүтэбит.
Анна Дормидонтова