Кэнники икки күҥҥэ халлааммыт ардаан, сөрүүдүйэн, ойуур баһаара арыый амыраата.
Улууспут үрдүнэн сайыҥҥы кэмҥэ хас ойуур баһаара турбутун, төһө киһи үлэлээбитин туһунан Горнайдааҕы лесничество салайааччытын Ирина Алексееваны сырдатарыгар көрдөстүм:
– Быйыл баһаар сезонун кэмигэр Горнайга 22 ойуур баһаара тахсыбыта бэлиэтэннэ. Билиҥҥи туругунан уот Чыбырҕаска – 920 гаа, Оҕуруктаахха 3 916 гаа, Үлээгиргэ – 13 гаа, Сиинэҕэ Туобуйа быыһыгар – 5 898 гаа (сирэ ыраах буолан, үөһэттэн кэтээн көрүү үлэтэ барар), Түгэнэҕэ — 90 гаа (умуллардылар), Чабыдаҕа – 1 гаа (умуллардылар), Бүлүүттэн киирбит уот Кэптин сиригэр – 12 656 гаа сири сиэтэ.
Уоту утары охсуһууга Тааттаттан, Амматтан, Чурапчыттан, Горнайтан «Авиалесоохрана», «Якутлесресурс», «Лесничество», барыта 230 киһи хабылынна. Ол иһигэр бэйэлэрин баҕа өттүнэн Намтан – 9, Горнайтан – 92 киһи, 16 №-дээх баһаарынай чаас – 5 байыаһа кытынна. 36 тиэхиньикэ сыһыарыллан үлэлээтэ.
Бу нэдиэлэҕэ Бүлүү уонна биһиги улууспут хайысхатынан ЯК-40 “метео” зондировщик сөмөлүөт былыты ытан, ардах түһэрин ситистэ. Ойуур баһаара турбут нэһилиэктэр салалталара, олохтоохторо көхтөөх үлэни ыытан, түмсүүлээхтэрин көрдөрдүлэр.
Баһаарга сылдьар дьоҥҥо «Темп», «Южный», «Арзу» маҕаһыыннар салайааччылара, эдэр урбаанньыт Виталий Романов аһынан-үөлүнэн көмөлөстүлэр, туттар малы-салы тириэрдиигэ улахан өйөбүл буолбуттарыттан махталбын биллэрэбин, – диэн сырдатта.
Күнү-дьылы кэтээн көрөөччүлэр биһиги улуус эргин өтөрүнэн ардах кэлэрин көрдөрбөттөр. Билигин да холкутуйар эрдэ. Бүтэһик баһаардар хонтуруолга ылылла иликтэр. Күн-дьыл туругуттан хайа баҕарар күөдьүйэн тахсыахтарын сөп. Онон кэтээн көрүү үлэтэ син биир ыытыллар.
Тыаҕа тахсар дьон уоттан сэрэхтээх буоларгытын умнумаҥ.
Вячеслав Алексеев