Оҕо бырааһын идэтин талан оҕо-аймах туһа диэн түүннэри-күнүстэри түбүгүрэн, үлэлии-хамсыы сылдьар оҕо быраастара чараас дууһалаах, сырдык дьон буолаллар.
Ол курдук, Горнайдааҕы киин балыыһаҕа 4 оҕо бырааһа үлэлиир. Бүгүн Аан дойдуга оҕолор уонна оҕо бырааһын күннэрин чэрчитинэн, саҥа үөрэҕин бүтэрээт үлэтин биһиги улуустан саҕалаабыт Дмитрий Алексеевы кытта кэпсэттибит. Эдэр быраас төһө да солото суох буоллар биһиги ыйытыктарбытыгар хоруйдаата.
«Мин 2022 с ХИФУ медицинскэй институту ситиһиилээхтик бутэрбитим. Ити сыл балаҕан ыйыгар Горнайдааҕы киин балыыһаҕа «Земский врач» диэн бырагырааманан үлэлии кэлбитим.
Үлэбин оҕо консультациятыттан саҕалаатым. Иккис учаастакка бырааһа буолабын.
Тоҕо бу идэни таллыҥ диэн ыйытыкка маннык этиэм этэ. Бэйэбин өйдүөхпүттэн быраас идэтин баһылыахпын, дьоҥҥо үтүөнү оҥоруохпун баҕарарым. Оскуолаҕа химия, биология уруоктарын интэриэһиргээн үөрэппитим.
Бу идэни талбыт, олохторун анаабыт быраастар аймахтарбар бааллар, Онон бу идэ миигин мэлдьи арыаллыы сылдьар. Быйыл бииргэ төрөөбүт быраатым ХИФУ Медицинскэй институтугар үөрэнэ киирдэ. Онтон мин олус үөрэбин.
Ыалбын, кэргэним Саргылаана Алексеева куоракка Дьокуускай куораттааҕы балыыһаҕа терапевт бырааһынан үлэлиир. Дьон доруобуйатын туһа диэн үлэлиир-хамсыыр ыалларбыт.
Түгэнинэн туһанан идэлээх күммүтүнэн бииргэ үлэлиир кэллиэгэлэрбин, бииргэ үөрэммит одногруппниктарбын, педиатр быраастары эҕэрдэлиибин. Үлэҕитигэр үрдүк ситиһиилэри, кытаанах доруобуйаны, дьолу-соргуну баҕарабын.
Сырдык идэлээх үрүҥ халааттаах аанньалларга мэлдьи болҕомтолоох, махталлаах буолуоҕуҥ, уустук үлэлэрин чэпчэтиэҕиҥ.
Нина Сутакова