Соторутааҕыта улуус, Бэрдьигэстээх, Одуну нэһилиэктэрин баһылыктара Никита Андреев, Алексей Аргунов, Владимир Текеянов СВО-ҕа сылдьар саллааттарбытын көрсө, Запорожскай уобаласка айаннаабыттара. Кинилэр улуус олохтоохторо, уолаттар төрөппүттэрэ, чугас дьонноро, аймахтара бэлэмнээбит көмөлөрүн, кэһиилэрин, илдьиттэрин тириэртилэр.
Улуус салалтата Украина сиригэр иккис сырыылара буолар. Уолаттары кытары сибээстэһэн, туохха наадыйалларын чопчулаһан, айаннарын устата киин куораттартан сакаастарын ыланнар аадырыстарга тириэртилэр. Кинилэргэ малы-салы буларга биир дойдулаахтара улахан көмө буоллулар.
Ийэ дойду иннигэр ытык иэстэрин чиэстээхтик толоро сылдьар хорсун уолаттарбыт улуус бөлөҕүн үөрэ-көтө көрүстүлэр. Дьиэлэриттэн кэлбит күүтүүлээх күндү кэһиилэрин астына амсайдылар. Бэйэ дьонун кытары атах тэпсэн олорон, ирэ-хоро кэпсэтэн, төрөөбүт дьиэлэрин-уоттарын сонунун дуоһуйа истэн, санаалара бөҕөргөөтө. Улуус дьонугар-сэргэтигэр бойобуой эҕэрдэлэрин, истиҥ махталларын тириэрдэллэр. Кыайыы көтөллөөх дойдуларыгар тиийиэхпит диэн эрэннэрэллэр.
Вячеслав Алексеев