Бүгүн Горнай улууһун Атамай нэһилиэгэр биир ураты умнуллубат күн тосхойдо. Учуутал күнүн көрсө, алтынньы 5 күнүгэр саҥа тутуллубут икки этээстээх 150 миэстэлээх таас оскуола аанын тэлэччи аһар кэрэ бэлиэ түгэнэ үүннэ. Олохтоохтор үөрүүлэрин үллэстэ СӨ Ил Дархан Айсен Николаев, СӨ Үөрэҕириитин уонна наукатын миниистирэ Ньургууна Соколова, биир дойдулаахпыт РФ үтүөлээх юриһа Макар Яковлев, Горнай улууһун баһылыга Никита Андреев, оскуола тутуутун ыыппыт «Союз инвест» ХЭТ дириэктэрэ, Андрей Копырин, ыҥырыылаах ыалдьыттар үллэстэллэр.
Бары билэрбит курдук, 2021 с. Бэс Күөл бөһүөлэгэр иэдээннээх баһаар кэнниттэн, дойдубут Президенэ Владимир Путин быһаччы дьаһалынан, өрөспүүбүлүкэбит Ил Дархана Айсен Николаев өйөбүлүнэн, «Үөрэҕирии» национальнай бырайыак чэрчитинэн саҥа оскуола тутуллан үлэҕэ киирдэ.
1981 с. тутуллубут, Сэбиэскэй Сойуус геройа В.Д.Лонгинов аатын сүгэр Атамай орто оскуолата – баай, дириҥ историялаах, үүнэр көлүөнэ ыччаты иитиигэ-үөрэтиигэ тус кылаатын киллэрсэн, айымньылаахтык, таһаарыылаахтык үлэлиир өрөспүүбүлүкэ биир кырдьаҕас оскуолата.
Манна улууспут үөрэҕириитин сайдарыгар тус кылааттарын киллэрсэн Атамай оскуолатыгар дириэктэрин үлэлээбит Иван Иннокентевич Павлов, Петр Михайлович Федоров, Николай Николаевичч Максимов, Василий Ефимович Суханов, Михаил Ефимович Тимофеев, Семен Спиридонович Исаков, Николай Иннокентьевич Аввакумов, Николай Прокопьевич Варламов, Светлана Кирилловна Охлопкова о.д.а. ааттарын умнубаттар.
Оскуолаҕа үлэлээбит бэтэрээн учууталларын Василий Денисович Иванову, Варвара Николаевна Антонованы, Тамара Егоровна Степанованы, Илья Афанасьевич Яковлевы, Агафия Васильевна Яковлеваны, Алла Филипповна Павлованы о.д.а махталынан ахталлар, киэн тутталлар.
Билиҥҥи педагогическай коллектив урукку үлэлээн ааспыт учууталлар уопуттарын туһанан, билиҥҥи кэмҥэ сөп түбэһиннэрэн, кэнчээри ыччат киэҥ билиилээх, олоххо бэлэмнээх киһи буолан, үүнэн-сайдан тахсалларыгар бары кыһамньытын уурар.
Ол курдук, оскуола коллектива улууска биир бастакынан оскуола иһинэн Бизнес-инкубатор арыйан, агро хайысханы тутуһан, оҕолору үлэҕэ, урбааҥҥа сыһыаран дириҥ хорутуулаах үлэни ыыталлар. Оскуола үөрэнээччилэрэ Россия таһымнаах куоҥукурустарга ситиһиилээхтик кыттан төрөөбүт дойдуларын, бүтүн Саха сирин, улуустарын, нэһилиэктэрин аатын чиэстээхтик көмүскүүллэр. Онон оҕолор үрдүк ситиһиилэриттэн, үлэҕэ-хамнаска көхтөөхтөрүттэн нэһилиэк дьоно-сэргэтэ, үөрэтэр учууталлара үөрэллэр, киэн тутталлар.
Саҥа оскуола билиҥҥи кэм ирдэбилигэр эппиэттиир ыраас, сырдык үөрэнэр кабинеттардаах, агролабораториялаах, Бизнес-инкубатор, робототехника, медицинскэй кылаастардаах, киэҥ-куоҥ, сырдык аактабай, спорт саалалаах, аныгы кэм ирдэбилинэн толору хааччыллыылаах.
Онон, ойуур баһаарын алдьархайыгар эмсэҕэлээбит Бэс Күөл олохтоохторугар дойдубут Президенэ Владимир Путин тус бэйэтин дьаһалынан олоххо киирбит саҥа оскуола алгыстаах ыллыгынан, алтан чуораан тыаһынан ыраахтан-чугастан ыччаттарын ыҥыра, угуйа турдун. Бүтүн көлүөнэни иитэн-такайан таһаарбыт, В.Д.Лонгинов аатын чиэстээхтик сүгэр оскуола үтүө үгэһэ салҕанан, үйэлэргэ аата-суола ааттана, үүнэ-сайда туруохтун!
Күннэй Алексеева.