Бүгүн Горнай улууһун Солоҕонугар нэһилиэнньэ өр күүппүт баҕа санаата туолан, олохтоох сынньалаҥ киинэ саҥалыы өрөмүөннэнэн, аалай кыһыл лиэнтэ быһылынна.
Үөрүүлээх арыллыы Солоҕонтон куорсун анньыммыт СӨ народнай бэйиэтэ Савва Тарасов 90, СӨ народнай артыыьа Раиса Захарова 70 сылларыгар сөп түбэспитэ ураты суолталаах.

Үс сыл үлэлээбэххэ турбут сынньалаҥ киинин хапытаалынай өрөмүөнүн олохтоохтор Иван Захаров, Петр Платонов прорабтаан ылыстылар. Кинилэргэ эмиэ олохтоох устудьуоннар Роберт Тарасов, Евгений Сидоров, ыччаттар Валентин Дормидонтов, Геннадий Захаров, Степан Пахомов үлэлээтилэр. Ититиитин коммунальнай хаһаайыстыба маастара Василий Павлов сыбааркалаабыт. Муостатын саҥалыы Григорий Сидоров уонна Александр Константинов оҥорбуттар.

Олохтоохтор үөрүүлэрин 9 ыйдаах үлэтин отчуотун ыыта кэлбит улуус баһылыга Никита Андреев үллэһиннэ.

Олохтоох сынньалаҥ киинэ — тыа сирин-дьонун түмэр, сомоҕолуур кыахтанна. Онон Солоҕон олохтоохторун бүгүҥҥү күнтэн ыла,  кулууп сырдык уоттара ыҥыра, угуйа турдуннар!

Нина Сутакова.